UVIÉU, 2 Oct. (EUROPA PRESS) -
Esti 2 d'ochobre ye'l Día del Llibru y el Discu Asturianu y toles producciones culturales n'asturianu van tener un 10% de descuentu. Ente les principales novedaes que los llectores van poder topar nes llibreríes ta la novela ganadores del Premiu Xosefa Xovellanos, 'Los xardinos de la lluna', de Francisco Álvarez, y 'Nunn', la primer novela de Xandru Martino pa públicu adultu.
La Selmana de les Lletres Asturianes ye l'eventu más importante alredor de la lliteratura n'asturianu y gallego-asturianu que se convoca n'Asturies. La cita, programada pal mes de mayu pasáu, aplazóse pola crisis provocada pola covid-19 y va celebrase la selmana del llunes 28 de setiembre al vienes 2 d'ochobre.
Na so 41 edición, la Selmana de les Lletres recupera la figura de la escritora María Teresa Villaverde, Tuxa (1882-1934), a quien homenaxa cola edición del llibru 'Postrer adiós. Prosa, poesía y teatru', y el documental 'Tuxa, tradición y sentimientu'. Tuxa foi una escritora del Rexonalismu de la primer metá del sieglu XX qu'escribió poesía y narrativa, y firmó obres de teatru.
Ente les principales novedaes que los llectores van poder topar nes llibreríes tán 'Los xardinos de la lluna', de Francisco Álvarez. Trátase d'una novela negra ambientada na Italia d'anguaño y remembrando les más negres y tristes alcordances de les Brigaes Coloraes al través de les Brigaes Coloraes Refundaes, Daniele, fíu d'italianu y asturiana de Xixón, vese somorguiáu nun rabión de circunstancies que-y faen cambiar la vida y la so forma de sentila y de vivila.
Otra manera, 'Nunn' ye la primer novela p'adultos de Xandru Martino. Ambientada nos primeros años del sieglu I nel castru El Picu (Caravia), nárrense los tiempos de la invasión romana d'Asturies. La vida tranquila nel castru vese tarazada por anuncies que falen de columnes de romanos qu'entren pela cordalera y van avanzando pel ríu hasta aportar a les puertes de Noega. Nárrense asina les rellaciones de los pueblos y les tribus de la xente ástur a lo llargo invasión romana.
Per otru llau, tamién ta acabantes de publicase 'El silenciu invisible', de José Ángel Gayol, la obra que se fixo col Premiu d'Ensayu Máximo Fuertes Acevedo 2019. Ye un llibru a medio camín ente la obra d'arte y la de pensamientu y trata de cómo nel silenciu de la pintura vamos poder descubrir l'otru silenciu necesariu pal entendimientu y la comprensión de la realidá -la Verdá- esterior.
Tamién ta na cai 'El llar n'orde', de Gonzalo G. Barreñada, poemariu que se fixo col XXV Premiu Xuan María Acebal. Usando munches veces un tonu cuasi d'elexía y a veces sentimental, valiéndose tanto de la cotidianidá como de los elementos ficticios o simbólicos, l'autor nun escuende que la so intención última ye poner n'orde dalgunos de los fechos principales de la so historia personal.
P'acabar, en lliteratura infantil destaca 'Xosefa de Xovellanos', de Vicente García Oliva, onde l'autor fai un repasu a la vida y obra d'esta escritora, a la vez que se destaquen los estereotipos qu'entá queden por valtar.
