Llingua, cultura y tresgresión: l’universu de Damián Barreiro toma vida esti viernes n'Avilés

   UVIÉU, 2 May. (EUROPA PRESS) -

   La Casa de Cultura d'Avilés acueye esti vienres a les 19:30 hores un actu d'homenaxe al periodista Damián Barreiro, fináu inesperadamente'l pasáu 5 de febreru con solo 40 años. La cita, entamada pol Conceyu d'Avilés y la Xunta pola Defensa de la Llingua Asturiana, pretende ser un espaciu pa recordar la so figura dende l'afectu, la cultura y la identidá.

   Baxo'l títulu 'Universu Damián', l'homenaxe va xuntar artistes y personalidaes que representen el mundu del qu'escribía'l periodista: el músicu Rodrigo Cuevas, la cantaora Mariluz Cristóbal Caunedo, el DJ Fruela 757, el grupu tradicional Algaire, el gaiteru Llorián García Flórez, la cantante y acordeonista Beatriz y la actriz Natalia Suárez Ríos. La entrada ye llibre hasta completar aforu.

   La cita va ser, según los organizadores, un alcuentru con "la cultura pop y de raigañu, tresgresión, identidá, diversión y país", elementos que formaben parte del ADN creativu de Barreiro, y qu'agora sirven pa trazar un homenaxe pensáu "dende l'amistá".

UN PERIODISTA DE REFERENCIA N'ASTURIANU

   Damián Barreiro foi un periodista y analista cultural de referencia na cultura asturiana contemporánea. Llicenciáu en Periodismu pola Universidá del País Vascu, trabayó en medios como Asturies.com, Les Noticies y, dende va años n'Europa Press. Foi miembru del conseyu de redacción del Anuariu de la Música Asturiana y collaboró con medios especializaos como Musicasturiana.com.

    Foi'l creador de la canal de YouTube 'Horros y Frixuelos' nel qu'analizaba la cultura asturiana "dende la so particular perspectiva pop, aportando un gran valir a los estudios sobre la identidá'l país".

   Como ensayista, ganó trés vegaes el Premiu Máximo Fuertes Acevedo con obres como 'Asturploitation', 'Caleya Sésamu' o 'Asturianía kitsch: decálogu de la cultura pop astur', y el premiu Fierro Botas col trabayu 'L'espeyu onde miranos'. Tamién ye autor del llibru 'Yo la to llingua', dirixíu a la mocedá.