MADRID, 17 d'Abril (EUROPA PRESS)
El Conseyu de Ministros aprobó esti vienres el proyectu de llei de reforma de la Llei Xeneral Tributaria, nel que se contempla la publicación de la llista de morosos, que nun va incluyir a aquellos contribuyentes que solicitaren l'aplazamientu o la suspensión de les deudes.
Al cabu de la xunta del Conseyu de Ministros, el titular de Facienda, Cristóbal Montoro, destacó que la llei pretende potenciar la llucha contra'l fraude, baxar la conflictividá y elevar la seguridá xurídica.
Dientro del bloque de llucha contra'l fraude incluyóse la publicación de la llista de deudores o morosos de la Facienda Pública, siempre que les deudes contraíes superen el millón d'euros y nun s'ingresaren nel plazu d'ingresu en voluntaria.
Queden escluyíos, por encamientu del Conseyu d'Estáu, aquellos contribuyentes que tengan deudes o sanciones que tean aplazaes o suspendíes. "Creemos que (l'encamientu del Conseyu d'Estáu) ye bien pertinente y acertada y por eso llendamos esa publicación", añadió.
Coles mesmes, indicó que los contribuyentes que van apaecer na llista van contar con un trámite previu d'alegaciones y van poder impugnar la decisión final d'apaecer na mesma pela vía contencioso-alministrativa.
Xuntu con esti proyectu de llei, el Gobiernu aprobó tamién una llei orgánica pa publicar otra llista de condenaos en sentencia firme por delitu fiscal, anque nun va publicase la sentencia completa pa garantizar los derechos al honor y la intimidá de los ciudadanos y "namás va dase cuenta de los aspectos estructuralmente necesarios".
