Actualizado 02/05/2018 13:29:19 +00:00 CET

La lliteratura infantil y el gallego-asturianu protagonicen l'actu institucional de la Selmana de les Lletres

Neños lleendo testos nel actu.
XUNTA XENERAL.

UVIÉU, 2 May. (EUROPA PRESS) -

Mediu centenar de neños y neñes participaron xunto a diputaos y representantes institucionales nel actu institucional de la Selmana de les Lletres, celebráu esti miércoles na Xunta Xeneral. Nél, la lliteratura infantil y xuvenil en llingua asturiana foi la protagonista, anque tamién el gallego-asturianu.

Esti foi l'idioma de dalgún de los testos lleíos polos diputaos, pero tamién el qu'usó'l presidente del Parllamentu, Pedro Sanjurjo, que se dirixó a tolos presentes y mentes tol actu nel idioma faláu nel Occidente asturianu, ente los ríos Navia y Eo.

Trátase d'un fechu que tien especial relevancia al tratase del segundu cargu institucional de la comunidá autónoma, namás per detrás del presidente del Principáu. Otra manera, Sanjurjo lleó un cuentu popular en gallego-asturianu qu'escuchaba na so propia casa, tituláu 'Adiós carne de Santiago'.

Per otru llau, el conseyeru d'Educación y Cultura, Genaro Alonso, lleó un capítulu de 'El Principín' d'Antoine de Saint-Exupéry, del que recordó que se cumplen 75 años de la so publicación; y la conseyera de Servicios y Derechos Sociales, Pilar Varela, fixo lo propio con 'El poema que cayó a la mar', d'Aurelio González Ovies.

Mentanto, 13 diputaos que representaron a tolos grupos encargáronse tamién de lleer testos. Foron cinco de Podemos Asturies --Rosa Espiño, Enrique López, Lorena Gil, Andrés Vilanova y Lucia Montejo--, dos d'IX --Concha Masa y Ovidio Zapico--, dos de Ciudadanos --Nicanor García y Armando Fernández Bartolomé--, dos de Foru Asturies --Cristina Coto y Carmen Fernández Gómez--, y ún de PSOE y PP --Nuria Devesa y Gloria García, respectivamente--.

Como curiosidá Rosa Espiño lleó un poema de Sofía Castañón, escritora y diputada de Podemos Asturies nel Congresu, y Cristina Coto optó por 'La batalla de Covadonga', de Caveda y Nava. Mentanto, la 'popular' Gloria García escoyó un testu de Berta Piñán.

Per otru llau, Milio Rodríguez Cueto foi l'autor seleccionáu por Nicanor García y Carmen Fernández Gómez, mentes que los diputaos Andrés Vilanova y Ovdio Zapico lleeron testos en gallego-asturianu.

Otra manera, ente un total de 29 autores, Adolfo Camilo Díaz, Chechu García, Milio Rodríguez Cueto o Berta Piñán foron dalgunos de los escritores más lleíos, la mayoría incluíos dientro de 'Cúntame un cuentu-Cúntame un conto', editáu pola Conseyería de Cultura y va regalase esi vienres, Día de les Lletres, al mercar llibros y música n'asturianu.

Amás de políticos, nel actu institucional tamién representantes d'otres instituciones, como la vicepresidenta de l'Academia de la Llingua Asturiana, Marta Mori, que xunto a Sanjurjo y Genaro Alonso presidió l'actu y que depués de recordar la cantidá de muyeres qu'escriben n'asturianu lleó un testu de Paquita Súarez Coalla.

Per otru llau, el director xeneral de Deportes, Ramón Tuero, sorprendió faciendo un homenaxe al desaparecido Igor Medio, lleendo la lletra del cantar 'Los fayeos de mayu'.

LOS NEÑOS PROTAGONISTES

Con too, perriba de los autores, el protagonismu foi pal mediu cientu de neños de les escueles Buenavista I, d'Uviéu, y Villalegre, d'Avilés que foron a la Xunta Xeneral. Dos alumnos del Villalegre, Olaya Álvarez González y Xulio Belver Gutiérrez, lleeron cachinos de 'Arroz, agua y maíz', de Berta Piñán.

Xulio Belver, que dixo que nun taba nerviosu porque yá practicara en casa, esplicó que'l testu ta inspiráu nun neñu de siete años que vive n'Irán. Sobre deprender asturianu, indicó que-y presta porque "ta bien saber otru idioma".

Per otru llau, Olaya Álvarez, dixo que diba lleer un testu sobre un neñu "que traviesa la selva o los silencios, contáu too d'una forma mui poética". Esta neña de 10 años indicó que los sos pas siempre-y dicen que si quier deprender dalgo nuevo que nun sía l'asturianu que pruebe, "pero yo quiero más dir a lo que siempre fui y me presta".

La maestra d'estos escolinos d'Avilés, Sonía Romano Monero, esplicó que lleven un mes preparando la llectura, reconoció qu'había unos "poquitinos" de nervios y esplicó qu'escoyeron el llibru porque taben trabayándolu en clase.

"Fixímoslo como si fuera una obra de teatru, prestó-yos muncho. Amás, lo de vinir a la Xunta Xeneral prestó tamién, porque pensaben que diba ser dalgo más serio y valió-yos pa deprender coses", indicó.

Per otru llau, en representación de la escuela Buenavista d'Uviéu, Manuel García Tuñón y Yaiza Mayo González recitaron el cuentu 'Capiellín colloráu', de Xosé Gago y Vicente García Oliva.

Asturianu ofrecido por

Lo más leído

  1. 1

    Irene Rosales muestra las consecuencias de su fatídica caída en Cantora

  2. 2

    La solución de Abascal ante los 'okupas': "Hay que sacarles de una patada en el culo el mismo día"

  3. 3

    Muere a los 23 años Daisy Coleman, protagonista del documental de Netflix Audrie y Daisy

  4. 4

    Las fotografías más apasionadas de Enrique Ponce y Ana Soria

  5. 5

    Vecinos de Galapagar se querellan contra Iglesias por el "acoso" contra ellos por protestar ante su vivienda