Los vecinos van entamar una manifestación el 18 de mayu
XIXÓN, 16 Abr. (EUROPA PRESS) -
Más de quinientes persones concentráronse a les 11.00 hores d'esti martes na rotonda de L'Arbeyal pa espresar el so refugu al proyectu del Ministeriu de Tresportes d'un vial de Xove en superficie, según la Federación d'Asociaciones Vecinales.
La protesta forma parte d'un calendariu de movilizaciones aprobáu depués del desestimientu de la llicitación del proyectu soterráu del vial de Xove, que quería amenorgar los problemes "graves" de contaminación na zona Oeste.
Amás de los vecinos, la Corporación xixonesa yá mostró tamién el so refugu al cambiu de criteriu del Ministeriu, al qu'esixe una solución rápida, eso sí, que nun sía en superficie.
La representación vecinal convocó una manifestación pal 18 de mayu, cola que quieren facer llegar al Ministeriu'l so refugu a treslladar el problema de la contaminación d'un llau a otru de la ciudá, con referencia a que'l tráficu pesáu que circula agora pela avenida de Príncipe d'Asturies con destín y salida del puertu xixonés d'El Musel va facelo per un vial en superficie en Xove.
