UVIÉU, 8 May. (EUROPA PRESS) -
El Ministeriu de Cultura, al traviés de la Dirección Xeneral del Llibru, del Cómic y de la Llectura, convocó les subvenciones pa la creación lliteraria, onde pela primer vez puen presentase obres n'asturianu.
El BOE publicó'l documentu esti llunes 6 de mayu y el plazu ta abiertu hasta'l 27 del mesmu mes. Van poder presentase obres de poesía, narrativa, ensayu, lliteratura infantil y xuvenil, teatru, cómic y novela gráfica d'obres orixinales y d'ilustración d'obres clásiques o contemporánees y traducción d'obres de dominiu públicu.
Los proyectos de creación lliteraria tienen que tar escritos en cualquiera de les llingües oficiales d'España, pero pela primer vez tamién se van almitir obres n'idiomes con reconocimientu xurídicu nos sos estatutos d'autonomía, como son l'asturianu o l'aragonés.
El ministru de Cultura, Ernest Urtasun, yá anunciara esta midida en febreru n'Avilés, mentes la sectorial de Cultura celebrada nel Centru Niemeyer. Ellí, acompañáu de la conseyera de Cultura, Política Llingüística y Deporte del Principáu, Vanessa Gutiérrez, Urtasun anunció que la lliteratura n'asturianu, magar nun ser oficial, diba poder optar a les ayudes a la creación lliteraria y a les ayudes próximes a la edición, dalgo que nun pasaba hasta la fecha --con too, col ministru Iceta permitióse que l'asturianu pudiera optar a les ayudes a la traducción ente llingües del Estáu--.
