XIXÓN, 22 Oct. (EUROPA PRESS) -
L'alcaldesa de Xixón, Carmen Moriyón (Foru), resaltó esti llunes que 'Los Locos' convirtióse nel primer grupu musical con una cai en Xixón, al otorgar el so nome a un parque infantil en Nuevo Roces.
"Xixón débe-y muncho a Los Locos, non namás pol éxitu del grupu, sinón pola so contribución al dinamismu cultural de la ciudá gracies al llabor docente y de producción de Carlos Redondo y Paco Martínez pelos que pasaron delles xeneraciones de músicos", sostuvo.
Asina lo destacó nel actu previu al descubrimientu de la placa del parque que rinde homenaxe a 'Los Locos', y que cuntó cola participación de Francisco Martínez, al que toos conocen como Paco Loco y l'escritor y lletrista xixonés Boni Pérez, amás de cola presencia de la batería del grupu Jaime Díaz Belaústegui y los familiares del tercer integrante, Carlos Redondo, yá fináu.
Moriyón incidió en que 'Los Locos' foi'l meyor grupu de la historia del pop-rock n'Asturies, "el más popular y influyente, y una de les más personales bandes españoles de los años 80", remarcó, pa depués señalar qu'a esos años munchos considéranlos "la década prodixosa".
Unos años, según la rexidora xixonesa, "marcaos pol optimismu y l'estímulu creativu nos que nun existíen les redes sociales, nin les reproducciones en Youtube, nin los videoclips virales", apuntó.
De 'Los Locos', indicó que foron los primeres en fusionar pop, funk y soul, dalgo que naquellos años yera novedoso abondo, a xuiciu de l'alcaldesa, que señaló que les sos lletres teníen según munchos críticos musicales un toque cinematográficu.
Tamién resaltó d'ellos que foron el guañu del Xixón Sound de los 90, un movimientu de música alternativa con grupos como Australian Blonde, Doctor Explosion, Penélope Trip o Nacho Vegas.
"Güei la ciudá de Xixón da-yos les gracies, y rínde-yos un sentíu y cenciellu homenaxe al dar el so nome a esti parque pol qu'ensin dulda pasen y van pasar delles xeneraciones de xixoneses", apuntó Moriyón.
Per otru llau, Paco Loco dixo qu'esperaba qu'otros artistes como Nacho Vegas o Jerónimo Granda tengan tamién una cai na ciudá. Amás, fixo estensible l'homenaxe a Toño Barral, "el que más fixo por Los Locos'".
Boni Pérez resaltó que ta perbién que la música popular tea nel caleyeru y espresó el so deséu a qu'otros conceyos sigan l'exemplu. Coles mesmes, festexó'l que s'empiece a rindir homenaxe a los que nacieron nel baby-boom de los años 60, "enantes de que faigan crack", bromió.
Coles mesmes, na placa destapada esti llunes, pue lleese el siguiente testu: "La ciudá de Xixón honra la so memoria dando nome a esti parque pola so pervalible contribución musical asturiana, al traviés d'una discografía que supo recoyer con talentu influencies de diversos estilos y les esmoliciones sentimentales de la so xeneración. Tamién s'alude a dellos de los sos cantares, dende 'Estás en Nueva York' a 'No se salva nadie' o 'Algo salvaje' .
