MADRID, 14 Feb. (EUROPA PRESS) -
La NASA dio esti miércoles por acabada la misión del robot rover Opportunity en Marte depués de 15 años esplorando la superficie del planeta coloráu. "Por misiones como esta va llegar el día en que los astronautes puedan caminar per Marte", aseguró Jim Bridenstine, alministrador de la NASA.
L'axencia estaunidense decidió dar por acabada la misión depués de más d'un millar d'intentos de contactu col robot, que quedó silenciáu por falta d'enerxía'l 10 de xunu por causa d'una nube de sable.
El vehículu d'esploración, alimentáu por enerxía solar, viose afectáu pol amenorgamientu drásticu de la radiación del Sol pol polvu en suspensión, llindando la capacidá de los sos paneles solares de cargar les bateríes que daben capacidá de movimientu y pa que funcionaren los sos preseos científicos.
"Fiximos tolos esfuercios razonables pa tratar de recuperar a Opportunity y creemos que la probabilidá de recibir una señal ye perbaxa como pa siguir colos esfuercios de recuperación", esplicó John Calles, xerente de proyectos de Opportunity nún de los llaboratorios de la NASA.
El rover Opportunity ta en Perseverance Valley, un ribayu nel cantu del cráter Endeavour, llugar al que llegó depués de percorrer cuasi 50 quilómetros dende'l so puntu de llegada a Marte, onde pasó trés llustros.
"Nun podría imaxinar un sitiu más afayadizu pa Opportunity qu'ún llamáu 'Valle del Esfotu'", aseguró un responsable de la NASA. Opportunity, un ximielgu del robot Spirit, convirtióse na máquina que permaneció más años n'activu en Marte.
