UVIÉU, 4 Ene. (EUROPA PRESS) -
El líder del PP Pablo Casado tresmitió a l'Academia de la Llingua Asturiana (ALLA) el so "so respetu y consideración dafechu pa col asturianu" y afirmó que'l so partíu tien el "deber" de defender los derechos y la pluralidá llingüística de tolos españoles.
Asina lo esplicó la institución al traviés d'una nota de prensa depués de qu'esti vienres el presidente de l'Academia, Xosé Antón González Riaño, recibiera una carta de respuesta de Pablo Casado a la qu'enantes-y unviare l'ALLA en rellación con unes declaraciones nes qu'esti cuestionaba la realidá del asturianu como llingua viva.
Na primer carta, la institución llingüística esplicaba al líder 'popular' la realidá histórica del idioma asturianu y la llexislación vixente, amás de dellos datos sobre la so presencia nel sistema educativu.
Agora, Casado diz que'l PP tien el deber de defender los derechos llingüísticos de tolos españoles y que la pluralidá llingüística de les comunidaes autónomes ye un patrimoniu cultural qu'hai que caltener, "pero ensin amenorgar la realidá del español como llingua común". Casado, según esplica l'ALLA, acaba la misiva mostrando'l so respetu y "consideración dafechu pa col asturianu".
Por eso, l'Academia valora'l tonu y el "sentíu constructivu" d'esta respuesta, lo qu'al so xuiciu tien de facer posible que nuna de les próximes visites del presidente del PP a Asturies haya un conceyu ente Casado y Riaño "p'afondar sobre la problemática llingüística y cultural d'Asturies".
