UVIÉU, 17 Nov. (EUROPA PRESS) -
El diputáu de Podemos, Rafael Palacios, esixó esti martes al Gobiernu del Principáu que cumpla y faiga cumplir la Llei pa la recuperación de la memoria democrática y que d'esta manera "el Conceyu d'Uviéu dexe de rise de la ciudadanía".
Palacios manifestó que la Llei de 2019 establecía un plazu d'un añu pa que se retiraren tolos símbolos franquistes, y nesi añu nada se fixo. Recordó amás qu'en febreru de 2020 la Xunta Xeneral aprobó una proposición non de Llei encamentando al Gobiernu a cumplir y facer cumplir la llei, especialmente nel conceyu d'Uviéu.
"Dicimos Uviéu especialmente porque siguimos teniendo que soportar n'Uviéu calles con nomes d'asesinos y siguimos teniendo que soportar al Conceyu d'Uviéu riéndose de la sociedá asturiana, del Gobiernu d'Asturies y moflándose de la ciudadanía", dixo Palacios.
Palacios facía estes declaraciones nel momentu de la entruga que planteó a la conseyera de Presidencia, Rita Camblor, na celebración de la comisión parllamentaria de Presidencia.
Rita Camblor aseguró que la conseyería de Presidencia va velar porque esta llei se cumpla y recordó los trámites y requerimientos a toles instituciones y alministraciones. Asina, destacó que nel casu del Conceyu d'Uviéu nel mes d'ochobre fíxose-y un requerimientu nuevu y dieron un plazu de seis meses pal cambiu de los nomes de cais.
