MADRID, 14 Feb. (EUROPA PRESS) -
Más d'una decena de pareyes homosexuales presentó una demanda conxunta énte un tribunal de Tokiu pa reclamar el so derechu a casar, porque consideren que les lleis actuales sobre matrimoniu violen la igualdá consagrada na Constitución del país asiáticu.
Anque delles localidaes yá reconocen a les pareyes de dos persones del mesmu sexu y en delles empreses tamién s'ampliaron los derechos, la llei nacional entá caltién que'l matrimoniu ye la unión ente un home y xuna muyer.
Un total de 13 pareyes de Tokiu y d'otres ciudaes de Xapón xuniéronse pa presentar una denuncia común énte La Xusticia de Tokiu. "Presentamos una pitición que representa a les minoríes sexuales de tol país", esplicó ún de les denunciantes, Kenji Aiba, en declaraciones a los medios, según la cadena NHK.
Otra de les demandantes, Ai Nakajima, confía en que sía "el primer pasu pa la llegalización del matrimoniu homosexual en Xapón", un país de marcáu calter conservador pero nel qu'agora los sondeos yá dexen entever una medría del apoyu social al matrimoniu gai.
El Gobiernu de Shinzo Abe, sicasí, guarda silenciu. El Ministeriu de Xusticia nipón refugó realizar nengún comentariu porque nun recibiera la pitición.
