UVIÉU, 12 Abr. (EUROPA PRESS) -
El portavoz del Gobiernu asturianu y conseyeru de Facienda y Fondos Europeos, el socialista Guillermo Peláez, afirmó esti vienres qu'existe una interllocución bona del Executivu autonómicu col Ministeriu de Tresportes y Movilidá Sostenible.
"El diálogu constante en cuestión de trabayu en defensa de los intereses d'Asturies siempre foi fluyíu", comentó Peláez a entrugues de los periodistes na rueda de prensa del Conseyu de Gobiernu.
Foi'l sábadu 6 d'abril cuando nunes declaraciones públiques, Peláez dixo que Tresportes tien que cumplir con Asturies por que volvieren confiar nesi departamentu.
Na rueda de prensa d'esti vienres, y depués de que destacara la "noticia positiva" de la recepción por Renfe de diez trenes Avril, de la serie S-106 que van circular per Galicia y Asturies, preguntáron-y a Peláez por si yá se creía entós más al Ministeriu de Tresportes que'l sábadu.
"Nin creemos nin dexamos de creer, nós vemos los fechos tanxibles y el fechu tanxible ye qu'hai una noticia bona, que Renfe yá recepcionó los trenes Avril. Y eso creo que ye positivu p'Asturies", respondió'l dirixente asturianu. Según Peláez, la llegada de los trenes "significa que se cumplen los compromisos con Asturies".
Sobre la interllocución col Ministeriu, dixo que ye bona. "Siempre hubo rellaciones fluyíes, nós defendemos los intereses d'Asturies, ellos tienen qu'atender una axenda muncho más amplia que la nuestra", indicó.
