AVILÉS, 22 Oct. (EUROPA PRESS) -
La Plaza Hermanos Orbón d'Avilés va acoyer esti vienres y esti sábadu la decimoséptima edición de la Seronda avilesina, con dos xornaes pa esfrutar de les tradiciones más destacaes de la cultura popular asturiana, con actividaes diverses como música y bailles tradicionales, teatru costumista, productos gastronómicos y mercáu artesanal y ecolóxicu.
Esti eventu presentáronlu esti llunes nel Conceyu d'Avilés les conceyales de Cultura y Consumu, Yolanda Alonso y Lucía Fernández Ron, respectivamente, acompañaes de los miembros de Xuntanza José Federico Álvarez, José María Villaboy, Joaquín Samartín y Rosalén Seco, amás de Montserrat Machicado, responsable de la Estaya de la Llingua d'Avilés.
La mañana del vienres va tar dedicada a los más pequeños, que van poder esfrutar de xuegos populares y un taller saludable impartíu por Borja Roces. Tamién se va entregar el premiu del concursu de cartelos de Seronda, que nesta ocasión recayó nel colexu Enrique Alonso. Nel concursu collaboraron l'artista avilesín Favila y la profesora de la Escuela d'Artes y Oficios, Carmen Peláez. Per otru llau, la bandina Los Gascones van ser los encargaos de l'animación musical na plaza.
La inauguración oficial va ser el vienres a les 19:30 hores, cola actuación de la Banda de Gaitas El Trasno. Media hora enantes va abrise la carpa que va acoyer el tradicional mercáu con productos artesanales y ecolóxicos, onde les castañes y la sidra van ser protagonistes. El restu de la tarde y de la nueche van tar centraes nel baille tradicional, con una muestra de dances y cantares populares con Xuntanza. A partir de les 22:30 hores va principiar la Nueche en Danza con Seis Reales y Cantaruxare.
El sábadu a mediudía va abrise otra vuelta la carpa. La sesión vermú va tar amenizada poles tonaes del alumnáu de la Escuela d'Anabel Santiago y la bandina Los Gascones. Va ser enantes de la xinta popular, na que va poder tastiase pote de berces y arroz con lleche por un preciu de 5 euros.
Pela tarde va ser el turnu del grupu de teatru 'Santa Bárbara' de Llaranes, que va interpretar la obra de teatru costumista 'El molín encarnáu'. A les 20:30 hores va actuar el prestixosu músicu multiinstrumentista Héctor Braga, y van zarrar la Seronda 2019 les bandes La Bonturné y Los Kikos del Maíz.
