Publicado 03/04/2018 18:28CET

El Plenu d'Uviéu aprueba'l dictame de la Xunta Asesora de Toponimia

Pleno del Ayuntamiento de Oviedo
EUROPA PRESS

UVIÉU, 3 Abr. (EUROPA PRESS) -

El Plenu del Conceyu d'Uviéu, colos votos a favor del PSOE, IX y Somos, y en contra del PP y de Ciudadanos, aprobó'l dictame de la Xunta Asesora de Toponimia, qu'inclúi los nuevos nomes del conceyu.

El conceyal d'Urbanismu del Conceyu, Ignacio Fernández del Páramo, defendió la propuesta de "dar oficialidá a los topónimos d'Uviéu".

Mentes la so intervención esplicó cómo se realizó'l dictame. "Tuvimos que percorrer el conceyu, delimitar y axuntar núcleos y parroquies y agora tamos poniéndo-yos el nome. Atopemos coses sorprendentes como núcleos de población desconocíos. Tuvimos que redibuxar llendes. Atopemos una situación surrealista", criticó.

El conceyal del Grupu Municipal de Ciudadanos, Luis Zaragoza, pidió que les coses "nun se faigan de cualquier manera" y que reconoza'l nome de cada parroquia tien que facese "con rigor científicu", dalgo qu'al so xuiciu "nun se produz nesti casu".

Amás, Zaragoza criticó qu'esta xera realizárase al traviés d'un contratu menor, recayendo nuna persona namás y que se realizó nun plazu de 3 meses. "Valoramos el trabayu del filólogu pero los medios puestos foron insuficientes", afirmó. Asina, el conceyal criticó que pa revisar la toponimia realizárase un contratu menor de 9.000 euros y pa un censu de los comercios de La Corredoria utilizárense 15.000 euros.

"Pidímos-yos que nun tengan priesa por ponese la medaya de la toponimia y que faigan el trabayu científicu que merez", concluyó'l conceyal.

Per otru llau, el conceyal del Grupu Municipal del PP, Gerardo Antuña afirmó que la propuesta presentada pol tripartitu "nun trata de toponimia sinón de cooficialidá". Asina, mostró'l so desalcuerdu porque "el mesmu informe nun s'esclaria de lo que fala, ¿Oviedo, Uvieu o Uvieo?".

Amás, el conceyal 'popular' pidió-y al alcalde, Wenceslao López, que-y esclarie a Del Páramo que "el conceyu llámase Oviedo y que tien d'atendese a la totalidá del mesmu, non yá al términu que designa la ciudá".

Asturianu ofrecido por