MADRID, 20 de Xunetu (EUROPA PRESS)
El PNV calificó esti martes "de mercancía averiada" la decena d'enmiendes que'l PSOE ofreció a les sos propuestes de resolución pal Debate sobre l'estáu de la Nación y avisó que los socialistes van tener que demostrar más voluntá si quieren un acuerdu pa los Presupuestos Xenerales del estáu del 2011.
El voceru axuntu del PNV, Aitor Esteban, espresó ante'l Plenu del Congresu la so "decepción" ante la "poca receptividá" del PSOE y quido dexar claro que les propuestes del PNV nun yeren "xuegos florales", sinón que pretendíen "testar" la disposición al diálogu qu'ofreció'l presidente del Gobiernu, José Luis Rodríguez Zapatero. "Van tener que demostrar muncha más voluntá", sentenció.
PROBAR LA VOLUNTÁ DE ZAPATERO
Dende la tribuna del hemiciclu, Esteban esplicó que les 15 propuestes del PNV, algunes de marcáu carácter nacionalista, buscaben "testar la voluntá real del Gobiernu" pa entamar un diálogu fondu y llegar a acuerdos estables, dao que, según insistió, los nacionalistes nun van siguir el xuegu de la xeometría variable.
"Podríen contar con nós siempre y cuando alvirtiéramos un compromisu real, decidíu y valiente de llegar a acuerdos de caláu que supongan una meyora nes posiciones qu'hasta agora vino defendiendo'l gobiernu en relación a Euskadi", argumentó, pa acabar señalando que'l PSOE nun ofreció nada reseñable.
Al so xuiciu, los socialistes "siguen cola mesma tónica, vaciando les propuestes del PNV o inorando los sos plantegamientos". Eso sí, avisó de que si alguién piensa que les propuestes del PNV yeren namás "xuegos florales", ta "bien equivocáu", y recordó que'l votu de güei va influyir na posición de futuros procesos de negociación nel Parlamentu.
Según el voceru nacionalista, les enmiendes ofrecíes pol PSOE son "mercancía averiada" que nun supón meyora alguna y quexóse de que, frente a la so apuesta por rematar en trés meses seis traspasos pendientes a Euskadi, los socialistes namás ofrecen una xunta de la comisión mista de tresferencies pa tratar namás algunos d'ellos enriba a últimos d'añu, yá colos presupuestos aprobaos. "Hai un maltratu a la realidá estatutaria vasca", denunció.
Nel so turnu d'intervención, el PSOE nun quiso referise a les enmiendes ofrecíes al PNV, nin tampoco comentar la cuestión el PP. El que sí citó les propuestes nacionalistes foi la diputada d'UPyD, Rosa Díez, qu'avanzó'l so votu en contra de toes elles por ser "una reedición del plan Ibarretxe en favor d'una especie d'independencia pa Euskadi sovencionada pol restu d'España".
