UVIÉU, 24 Abr. (EUROPA PRESS) -
El portavoz de Podemos Asturies, Enrique López, consideró una "vergüenza" que'l conseyeru de Presidencia, Guillermo Martínez, xustificara'l non usu de la llingua asturiana na campaña institucional pa informar sobre la celebración d'elecciones autonómiques en que "nunca" usaron esti idioma na campaña mentada.
A preguntes de los medios na rueda de prensa posterior al Conseyu de Gobiernu, el númberu dos del Executivu autonómicu respondió a les crítiques de la formación morada énte la campaña de promoción sobre les elecciones autonómiques del 26 de mayu por nun tener una versión en llingua asturiana. Na comparecencia mentada, Martínez aseguró que "nun hai precedentes" nel usu d'esta llingua nesta campaña y que por eso nun se contemplara.
Agora, dende Podemos, López respondió a Martínez que la so xustificación "parez una burlla y una vergüenza" y indicó que'l billingüismu castellanu-asturianu nesti tipu de campañes tendría que ser d'obligáu cumplimientu. Pa Enrique López, "si esi usu nun se da, ye un derechu qu'hai que conquistar", como los derechos de les muyeres o del colectivu LGTBIQ.
Por eso, encamentó al PSOE a decidir "si ta a favor en contra de la conquista de los derechos". "Nun hai nenguna razón de pesu pa que'l Gobiernu de Javier Fernández niéguese a incluyir l'asturianu nes campañes institucionales pa los comicios", señaló.
Nesi sentíu, insistió en preguntar al secretariu xeneral de la FSA, Adrián Barbón, y a los militantes socialistes qué opinión tienen d'esta "ocurrencia" del conseyeru Guillermo Martínez.
