UVIÉU, 21 Mar. (EUROPA PRESS) -
El portavoz de Podemos na Xunta Xeneral, Enrique López, punxo esti xueves sobre la mesa los nomes que la so formación propón pa la renovación de la Sindicatura de Cuentes. Son Fernando Urruticoechea, interventor nel Conceyu de Torre Pacheco (Murcia), y David Rivas, doctor en Ciencies Económiques y Empresariales pola Universidá Autónoma de Madrid, "conocíu polos sos llabores investigadores nel ámbitu de la Economía".
López realizó estes manifestaciones a los periodistes nos pasiellos de la Xunta Xeneral un día enantes qu'acabe'l plazu pa la renovación del órganu fiscalizador con una votación que se va celebrar nel plenu del 29 de marzu, l'últimu de la presente llexislatura.
Podemos considera que debe d'haber un compromisu de reforma de la Llei de la Sindicatura p'acabar "colos pactos de réxime" ente PSOE, PP y IX qu'utilizaben l'órganu pa "asitiar" a los políticos de los sos partíos por eso alvirtió de que la so formación "nun va entrar en pactos de despachu".
Nesti sentíu, López considera que tienen que camudar los criterios qu'esixen la Sindicatura porque "hasta agora nun foi capaz de detectar nin ún namás de los múltiples y graves casos de corrupción n'Asturies, como'l casu Marea, el del Niemeyer, nin otros, que supunxeron una resquiebra de dineru pa les arques públiques".
