UVIÉU, 15 Oct. (EUROPA PRESS) -
El conseyeru d'Empléu, Industria y Turismu, Isaac Pola, dixo esti llunes qu'espera que'l Gobiernu central, concretamente'l Ministeriu de Fomentu, articule dalgún tipu de midida pa compensar les "decisiones empresariales" de delles compañíes que decidieron nos últimos meses dexar d'operar dende Asturies.
Nunes declaraciones distribuyíes pol Gobiernu rexonal, Pola dixo que la competencia en tresporte aéreu ye de l'Alministración Xeneral del Estáu (AGE) al traviés del Ministeriu de Fomentu.
Esplicó que'l Gobiernu d'Asturies solicitó la convocatoria del Comité de Coordinación Aeroportuaria, onde tán representaos Fomentu, AENA, axentes sociales y tamién el Gobiernu del Principáu. L'oxetivu, dixo Pola, ye "ver qué midíes puen tomase nesta materia, en respuesta al conxuntu de decisiones empresariales qu'afecten a la conectividá aérea de la rexón".
Asina, el dirixente asturianu esplicó que "va reclamar" a la AGE que s'adopte dalguna midida que permita que "nun asocedan estes coses", en referencia a "precios anómalos dafechu nos viaxes domésticos".
Pola dixo que dende'l Principáu yá se ta actuando no que se refier a la so responsabilidá, con dos concursos p'axudicar convenios de promoción turística, ún de calter nacional y otru internacional. Esos trámites, espera, van tar llistos a final d'añu.
