UVIÉU, 15 Feb. (EUROPA PRESS) -
Los grupos parllamentarios de Podemos y Ciudadanos consiguieron nel plenu de la Xunta Xeneral d'esti vienres sacar alantre la toma en consideranza la proposición de llei pa modificar l'Estatutu d'Autonomía d'Asturies pa suprimir los aforamientos. Namás el PSOE, partíu que gobierna n'Asturies, votó en contra de tomala en consideranza.
Otros grupos, como PP, IX y Foru terminaron votando a favor de que se tramite la reforma nuna votación que sosprendió pola dureza de los discursos que caltuvieren los sos representantes contra la iniciativa y la oportunidá de la mesma.
La presidenta del PP d'Asturies, Mercedes Fernández, dixo que la iniciativa de Podemos y Ciudadanos yera un testu insuficiente y taba mal redactáu. "Los aforamientos nun son privilexos, son prerrogatives", señaló. Amás, consideró que yá nun queda tiempu pa tramitar la norma. "Les coses importantes fáense de primeres, si lo faen agora ye qu'hubo conseñes polítiques pa coyer un banderín pa elecciones", comentó na so intervención.
"¿Por qué lo traen agora?", preguntóse tamién la dirixente d'IX Concha Masa que tamién negó que l'aforamientu ye un privilexu. Acusó a los dirixentes de Podemos y Ciudadanos de recurrir a la demagoxa. Sicasí, tamién votó a favor de la toma en consideranza.
Lo mesmo fixeron los trés representantes de Foru Asturies. El so portavoz Pedro Leal criticara enantes la "demagoxa" de los proponentes, al qu'acusó de buscar "desmotivar a los ciudadanos de participar na vida política".
Los trece votos del PSOE, en contra, sí siguieron el discursu críticu que caltuvo'l portavoz socialista Marcelino Marcos Líndez, que sorrayó qu'a falta d'un mes pa terminar la llexislatura nun pue plantease una reforma estatutaria. Dixo que'l PSOE nun tien problema nengún n'encarar reformes nesta materia, pero non agora. "Pillémoslos col carrín de los xelaos", díxo-yos a los diputaos de Ciudadanos y Podemos, a los que recordó les sos crítiques al Gobiernu por "sobrecargar" de lleis nos últimos meses al parllamentu.
Sicasí, los representantes de Podemos y Ciudadanos, Lorena Gil y Diana Sánchez respectivamente, consideraron necesaria la reforma pa suprimir los aforamientos tanto de diputaos autonómicos como del Conseyu de Gobiernu. Afirmen qu'esa figura ye un "privilexu" y consideren qu'eses persones tienen que tener la mesma xusticia que cualquier ciudadanu.
