UVIÉU, 20 Nov. (EUROPA PRESS) -
El Partíu Popular d'Asturies va presentar iniciatives na Xunta Xeneral y nos Conceyos asturianos "pa garantizar la educación concertada, la educación especial o l'usu del castellanu".
La formación principió esti vienres n'Uviéu la campaña de recoyida de firmes contra la Llei d'Educación aprobada'l xueves nel Congresu de los Diputaos, la conocida como 'Llei Celaá'. Trátase d'una campaña que yá se ta faciendo a nivel nacional al traviés de la Plataforma 'MásPlurales'.
Esta reforma educativa supón en palabres de la presidenta del Partíu Popular d'Asturies, Teresa Mallada, "una amenaza a les llibertaes y derechos constitucionales, cola que'l PSOE se pon fuera de la Constitución".
La Xunta Local del PP d'Uviéu instaló una mesa na Plaza de la Escandalera a la qu'esti vienres foron l'alcalde d'Uviéu, Alfredo Canteli; el secretariu xeneral del PP d'Asturies, Álvaro Queipo; el secretariu xeneral de los populares uvieinos, Javier Cuesta, amás d'otros cargos del partíu, conceyales y diputaos rexonales del PP.
