UVIÉU, 20 Nov. (EUROPA PRESS) -
El Conseyu de Gobiernu del Principáu Asturies aprobó esti vienres la firma de 59 convenios de collaboración ente dellos departamentos de l'Alministración y l'Institutu pa la Transición Xusta pa desenvolver proyectos financiaos con fondos mineros, 42 de conceyos y 17 del Principáu.
Estes actuaciones van movilizar 92.242.000 euros ente 2021 y 2023, según indicó en rueda de prensa la directora xeneral d'Enerxía y Minería, Belarmina Díaz, que compareció xunto la portavoz del Executivu, Melania Álvarez.
Nesi sentíu, esplicó que l'Institutu pa la Transición Xusta, organismu ascritu al Ministeriu d'Enerxía, Turismu y Axenda Dixital, va financiar el 75% del gastu, mentes que'l Principáu va facese cargu del 25% restante. La previsión ye que los alcuerdos se suscriban anguaño y qu'empiece la so execución a principios de 2021.
Ente los proyectu ta la reconstrucción de la estación iverniza de Valgrande-Payares (10 millones); el soterramientu de les víes de ferrocarril de Llangréu nes fases d'urbanización y accesos (9,9 millones); l'ampliación del centru d'empreses TIC de L'Entregu (8 millones); y la meyora de la eficiencia enerxética de 258 viviendes públiques del barriu de San José de Lada (7 millones).
Tamién se va impulsar la restauración de suelos contaminaos o terrenos degradaos, la meyora y desarrollu de dellos polígonos industriales, distintes obres de saneamientu en Llaviana, Ayer, Quirós, Cangas, Piloña o Degaña, y la incorporación de sistemes d'eficiencia enerxética n'árees empresariales y edificios de titularidá pública.
Asina, va urbanizase l'área industrial de Vil.layana, en L.lena (5 millones); el desarrollu d'un espaciu empresarial y comercial nos antiguos Talleres del Conde, en Llangréu (3,2 millones); l'allargamientu de la rede de calefacción nel cascu urbanu de Mieres al traviés del aprovechamintu de xeotermia d'agua de mina del pozu Barredo (2,4 millones); el proyectu pa la instalación d'un viveru d'empreses d'actividaes turístiques, deporte activu y centru tecnolóxicu de La Camocha, en Xixón (1,5 millones); o la ponte sobre'l ríu Nalón nel polígonu de Lluniegu-Tudela, n'Uviéu (1,5 millones).
