UVIÉU, 28 d'Abril (EUROPA PRESS)
La conseyera de Desarrollu Rural y Recursos Naturales, María Jesús Álvarez, manifestó esti xueves nel Plenu qu'esta selmana acabó'l trabayu de cargar los datos na aplicación informática a los ganaderos que fueron oxetu d'inspección, lo que va facer posible l'ingresu de les sovenciones. Asina indicó que la próxima selmana va pagase a los 10.732 ganaderos ayudes por valor de 7,6 millones pol pagu básicu, el pagu verde y el pagu a mozos.
Esplicó que parte de los pagos realizáronse yá nel 2015, magar que'l plazu llegal pal so abonu remata en xunu d'esi añu. Amás achacó al sistema informáticu nacional los problemes pal pagu d'estes ayudes por adelantao. "Asturies ye la tercer rexón d'España que más pagos antemanaos abonó, el 81,5% del total y tamos bien penriba de la media estatal y bien penriba de les cifres de Cantabria o Galicia", dixo.
Al respective de les ayudes estraordinaries aprobaes pola UE indicó que les mesmes yá se pagaron nel mes de marzu d'esti añu a un total de 1.982 ganaderos, por más de dos millones d'euros.
Álvarez dio asina respuesta a una pregunta de la diputada d'IU, María Josefa Miranda, que preguntó a la conseyera polos motivos polos qu'una parte de los ganaderos asturianos tovía nun cobró les ayudes estraordinaries aprobaes pola UE al sector lácteo nel 2015 nin les ayudes de la PAC d'esti añu.
La diputada d'IU pela so parte indicó que los retrasos nos ingresos de la PAC pa los ganaderos suponen unes consecuencies bien importantes, como la perda de vaques de lleche porque los ganaderos nun tienen nin pa da-yos el piensu apropiáu.
"Van cobrar nel 2016 les ayudes del 2016 y les del 2015 y eso supondrá-yos problemes fiscales que supongo ustedes nun van asumir", indicó Miranda.
Álvarez reconoció la situación que se xenera "ye complicada" ya indicó que nun va tener una solución cenciella y la mesma tendrá que venir del Ministeriu de Facienda.
SITUACIÓN DEL SECTOR LLECHERA
Antes d'esta entruga a la conseyera volvieron interpelala, nesti casu Foru, sobre la situación del sector lacteu n'Asturies. Álvarez recordó que fai un par de selmanes refirióse a esta cuestión y nun se produxo nengún cambiu.
Asina volvió resaltar que la situación del Principáu ye meyor que la de les sos comunidaes vecines no qu'al sector lacteu refierse y "nun ye méritu de la conseyera, sinón méritu del sector y de la presencia de CLAS, qu'acueye al 70% de los productores y la presencia d'una industria con compromisu territorial".
