UVIÉU, 20 Nov. (EUROPA PRESS) -
El Gobiernu del Principáu d'Asturies caltién abierta la negociación colos grupos parllamentarios de la Xunta Xeneral enantes d'aprobar el proyectu de presupuestos pa llograr "un alcuerdu ampliu" pa sacar alantre les cuentes de 2021. L'añu pasáu, l'Executivu aprobó'l proyectu'l día 5 d'avientu.
En respuesta a los medios de comunicación na rueda de prensa posterior al Conseyu de Gobiernu, la portavoz del Executivu, Melania Álvarez, señaló que'l procesu de negociación ta "en marcha" en busca "un consensu y un alcuerdu ampliu".
"Una vez acabe esi procesu va ser cuando'l Conseyu de Gobiernu de lluz verde a esi proyectu y va unviase depués a la Xunta Xeneral del Principáu pa la so aprobación", dixo, resaltando que ye "imprescindible" p'Asturies cuntar en 2021 con unos presupuestos pa encarar "la crisis sanitaria y el procesu de recuperación".
Sobre la evolución del andanciu de COVID-19 na comunidá, Álvarez recordó qu'esti llunes, día 23, va aconceyar el comité de crisis pa evaluar la situación y analizar la posibilidá de reapertura del comerciu minorista.
La prórroga de les restricciones de movilidá y el pieslle d'actividaes non esenciales tán a valir hasta'l 3 d'avientu, víspora de la ponte de la Constitución. Nesi sentíu, la portavoz del Gobiernu d'Adrián Barbón insistió que va ser la evolución del andanciu la que determine les midíes a adoptar en cada momentu.
