UVIÉU, 13 Ago. (EUROPA PRESS) -
El Gobiernu d'Asturies prepara una celebración del 8 de setiembre, Día d'Asturies, distinta a la d'años anteriores. Ésta podría tomar como base l'homenaxe institucional a los finaos pol coronavirus celebráu nel 'Texu de l'Alcordanza'.
Asina se pue ver nes últimes declaraciones del Executivu, onde indicaron que la celebración nun se va desmarcar de la situación xenerada pola crisis sanitaria y que va ser distinta a la d'años anteriores, cola entrega de les Medayes d'Asturies nel Auditoriu Príncipe Felipe y la celebración itinerante cada añu nun conceyu con conciertos, actuaciones de música tradicional y mercaos.
Esti xueves, la portavoz del Gobiernu, Melania Álvarez, señaló a entrugues de los medios depués del Conseyu de Gobiernu que la celebración d'anguaño "nun va tar al marxe d'esta situación nueva", en referencia a la crisis sanitaria. Amás, indicó que va ser nos díes próximos cuando se conozan los detalles de la celebración.
Un día enantes, nuna visita a Cuideiru, el presidente Adrián Barbón anunció que l'Executivu diba ser "exemplar" coles normes sanitaries, como lo foi, recordó, col actu d'homenaxe a les víctimes de la Covid-19 nel Texu de l'Alcordanza, xunto al HUCA.
Va ser, según indicó, un Día d'Asturies "distintu y especial". "Un día pal respetu non namás a les victimas sinón a los que tuvieron coronavirus y siguieron alantre y a toles persones que s'implicaron nesa llucha", afirmó Barbón, p'añadir que dende'l Principáu tán trabayando nun "marcu distintu". "Nun va ser l'actu avezáu d'entrega de medayes, porque hai una situación escepcional", anunció.
40 AÑOS DE FESTIVIDÁ
Foi en 1984 cuando una llei, la Llei 5/1984 del 28 de xunu, instituyó como Día d'Asturies el 8 de setiembre coincidiendo cola festividá de la Santina. La llei estableció una celebración institucional itinerante nuna localidá determinada pol Conseyu de Gobiernu.
Con too, cuatro años enantes, en 1980, un decretu del Conseyu Rexonal d'Asturies, órganu preautonómicu, yá instituyera esa fecha énte la d'organizaciones culturales, como Conceyu Bable, que celebraron na Transición el 25 de mayu --n'alcordanza de la declaración de soberanía de la Xunta Xeneral en 1808-- como Día d'Asturies.
La primer celebración oficial foi en Cangues d'Onís --primer capital del Reinu d'Asturies--. Depués vinieron Xixón y Avilés. Nesta última ciudá, l'actu institucional celebróse na Ilesia vieya de Sabugo y acoyó pela primer vez nuna xunta oficial entamada pol Principáu un discursu en llingua asturiana. Foi en boca de Josefina Martínez como miembru de l'Academia de la Llingua Asturiana, que tomó la palabra nel actu enantes del alcalde de la ciudá, Manuel Ponga, y del presidente Rafael Fernández.
Cola aprobación del Estatutu d'Autonomía, la Xunta Xeneral punxo en marcha en 1984 una comisión parllamentaria que dictaminó que'l Día de la virxe de Cuadonga yera'l más afayadizu pa celebrar la festividá.
Amás, proponía una rotación de llugares del Oriente como escenariu de celebración, ensin perxuiciu de que se centrara "na zona de Cangues d'Onís". Per otru llau, recoyía que los actos institucionales tendríen de ser compatibles colos actos relixosos nel Santuariu de Cuadonga.
A partir de 1986 empezaron a dase les Medayes d'Asturies, con una primer insinia d'oru que foi pa Felipe de Borbón y Grecia, naquel momentu Príncipe d'Asturies. Dos años depués, tamién s'empezó a celebrar un plenu institucional con calter estraordinariu pola Xunta Xeneral que s'aprobó, pela primer vez, pola Xunta de Portavoces el 5 de setiembre de 1988.
