UVIÉU, 12 Dic. (EUROPA PRESS) -
Un grupu d'espertos docentes y filólogos va principiar trabayar l'añu próximu na redacción d'un decretu pa establecer los niveles de competencia nel usu del gallego-asturianu y asina adaptalos al Marcu Común Européu de Referencia de les Llingües.
L'oxetivu ye regular la prueba de certificación correspondiente y poder acreitar asina la conocencia d'esta llingua na comunidá autónoma, falada ente los ríos Navia y Eo.
La decisión de la Conseyería d'Educación y Cultura d'incluyir el gallego-asturianu dientro del procesu p'acreitar los niveles de competencia en llingua asturiana --que yá ta en fase d'información pública--, respuende a la solicitú de les autoridaes municipales y dellos colectivos de la zona Navia-Eo, amás de la mesma Academia de la Llingua Asturiana, qu'encamentaron a que se regularen tamién les cuestiones relatives a la llingua propia del Occidente.
El Gobiernu d'Asturies decidió redactar pa eso un decretu específicu, avaláu pol trabayu que se fixo enantes cola llingua asturiana.
Esta midida va permitir establecer unes certificaciones oficiales qu'acreiten la conocencia de dambes llingües, l'asturianu y el gallego-asturianu, más allá de les titulaciones actuales, referíes namás a la formación del profesoráu especialista.
