UVIÉU, 27 May. (EUROPA PRESS) -
La conseyera d'Educación del Principáu, Lydia Espina, anunció esti xueves que se va pidir opinión al Conseyu Consultivu pa clarificar si ye viable la llinia abierta pol Gobiernu d'Aragón p'avanzar, al traviés d'una orde, na oficialidá docente ensin oficialidá.
Asina, en respuesta en sede parllamentaria al portavoz de Foru, Adrián Pumares, sobre qué actuaciones ta faciendo pa llograr que se cree la especialidá docente de Llingua Asturiana y Lliteratura, Espina incidió en que dende'l Ministeriu señaláron-y que nun ye viable y que namás pue haber especialidá docente si hai oficialidá, pero énte esi movimientu d'Aragón, va pidise tamién opinión al Consultivu.
"Nun nos rindimos, la nuestra intención ye clara y cristalina", dixo la conseyera, remarcando la voluntá política del Executivu del socialista Adrián Barbón tanto cola especialidá docente como cola oficialidá del asturianu, de la qu'aprovechó pa reprocha-y al diputáu de Foru que'l "votu que se necesitaba" pa llogralo "yera'l suyu y nun ta".
Sobre l'asturianu tamién se centró una entruga de la diputada de Podemos, Nuria Rodríguez, que quería conocer les razones poles qué l'asturianu nun computa como otros idiomes na baremación de puntuación nos procesos públicos d'accesu a la educación.
Espina, que repitió una respuesta d'hai unos meses a una entruga similar argumentando la imposibilidá de baramación al nun ser llingua oficial, insistió en que'l so departamentu ta trabayando pa modificar el decretu de formaciones enantes de fin d'añu y asina reconocer la formación d'asturianu nos procesos d'accesu a la docencia.
La conseyera resaltó, igualmente, l'apueste del Gobiernu pol asturianu, incluyíu'l refuerciu curricular, y la so voluntá política pa llograr la oficialidá.
