UVIÉU, 2 May. (EUROPA PRESS) -
La Conseyería de Cultura, Política Llingüística y Deporte va principiar esti mesmu añu'l procesu pa oficializar na so forma tradicional los nomes de los conceyos asturianos.
Amás, bien ceo va aprobar en Conseyu de Gobiernu'l decretu que va permitir recuperar los nomes populares de los accidentes xeográficos (ríos, montes, puertos de monte...).
Pa recuperar los nomes de los conceyos, el Gobiernu va dirixise a los Conceyos con una propuesta de oficialización, "pero van ser ellos los que tengan la palabra", según indicó la conseyera del ramu, Vanessa Gutiérrez, qu'aseguró qu'esi contactu va realizase "bien ceo con una propuesta pa que la valoren y dean la respuesta correspondiente".
Per otru llau, nestos momentos 74 de los 78 conceyos asturianos yá tienen la toponimia tradicional de les sos entidaes de población oficializada. Queden cuatro --Ayande, Cuideiru, Ibias y Navia--. Preguntada pol marcu temporal pa qu'esti procesu, qu'empezó en 2002, remate, Gutiérrez indicó que l'Executiva espera "que sía bien ceo" porque "hai una rellación constante colos Conceyos".
Asina lo indicó la conseyera na presentación del 'Nomenclátor Xeográficu de la Toponimia Oficial d'Asturies', nuna rueda de prensa acompañáu del conseyeru d'Ordenación de Territoriu, Urbanismu, Vivienda y Derechos Ciudadanos, Ovidio Zapico, y la directora xeneral d'Urbanismu, Laura López.
Trátase d'un trabayu que recueye 24.000 topónimos, 16.641 xeolocalizaos a los qu'a finales d'añu van añadise los de los once últimos conceyos que vieron aprobada la toponimia tradicional de les sos entidaes de población.
El 'Nomenclátor', descargable en dellos formatos, recueye distintes grafíes de les entidaes de población según el so volume de población, nivel de prestación de servicios, si son urbanizaciones o barrios interiores. Un trabayu que, según Laura López, realizóse en collaboración colos Conceyos, validándolo tanto les entidaes locales como los vecinos de los distintos llugares, que foron consultaos.
Per otru llau, Zapico afirmó que "ye bono pa la cultura asturiana poder definir sobre un mapa toa esa toponimia" porque ye "un legáu cultural que tamos obligaos a caltener pa les xeneraciones vinientes". Amás, destacó'l compromisu del "gobiernu d'unidá progresista" cola llingua propia.
Nesi sentíu, coincidiendo cola Selmana de les Lletres Asturianes, insistió en reivindicar la oficialidá, un marcu llegal pal qu'aseguró que "va llegar el momentu políticu afayadizu".
