MADRID, 22 Feb. (EUROPA PRESS) -
A última hora d'esti xueves decretóse prisión provisional, comunicada y ensin fianza pa los trés sospechosos del crime de Llanes por un delitu d'asesinatu, ensin perxuiciu de qu'esta calificación pudiera modificase a lo llargo de la instrucción.
Según confirmó fontes del Tribunal Superior de Xusticia d'Asturies a Europa Press, de los trés deteníos en rellación pol asesinatu del conceyal de Llanes Javier Ardines, namás quixo declarar de forma amplia'l ciudadanu arxelín, que reconoció la so participación activa, tanto na preparación, como na execución de lo encargao.
Per otru llau, l'intermediariu acoyóse al so derechu a nun declarar, mentes que'l presuntu inductor fixo una intervención mui curtia onde nun reconoz nin l'encargu nin la so participación y nun aceptó entrugues.
Sobre'l cuartu presuntu autor, otru ciudadanu arxelín que ta en prisión provisional trés meses en Suiza por robu con fuercia, estes mesmes fontes señalaron que podría estraditase enantes d'esos trés meses, gracies a la collaboración ente les dos alministraciones de xusticia.
Fontes de la investigación deslligaron el crime de motivaciones polítiques y rellacionáronlo con cuestiones sentimentales, porque les pruebes pescanciaes señalen a que l'encargu foi por una cuestión de celos pola relación ente Ardines y la prima de la so muyer.
La muerte d'Ardines por golpes na cabeza asocedió'l 16 d'agostu de 2018 nun camín de la redolada de la so casa en Belmonte (Pría), en Llanes.
