La TPA va recibir 70.000 euros dedicaos al doblaxe de dibuxos animaos
UVIÉU, 27 Nov. (EUROPA PRESS) -
La partida para promoción del asturianu recoyida nel proyectu de presupuestos pa 2019, pactáu ente PSOE, Podemos Asturies y IX, xube a 1.703.630 euros, lo que supón el 0,04% del total de les cuentes autonómiques y el 0,2% de tol presupuestu de la Conseyería d'Educación y Cultura.
Asina, la Dirección Xeneral de Planificación Llingüística y Normalización de la Conseyería d'Educación y Cultura cunta con creitos asignaos por un importe de 1,7 millones d'euros, lo que la convierte na dirección xeneral con menos presupuestu de tola Alministración.
Con esta partida, según se recueye nes cuentes presentaes esti martes, pretenden entamase les actuaciones recoyíes nel Plan de Normalización Social de la Llingua Asturiana y caltener la collaboración colos distintos conceyos nel funcionamientu de los servicios de normalización llingüística.
Per otru llau, pela primer vez, falase ente les acciones a llevar alantre la ellaboración y xestión de les convocatories de les pruebes de certificación correspondiente a los niveles de competencies n'asturianu.
DOBLAXE D'ANIMACIÓN
La partida dedicada a la política llingüística inclúi una tresferencia a RTPA por importe de 70.000 euros. La mesma yá se contemplaba nel proyectu pa 2018, qu'a la fin nun salió alantre al nun recibir l'apoyu de Podemos Asturies.
Según anunció nel so momentu'l director xeneral de Planificación Llingüística y Normalización, Fernando Padilla, esta partida dedicaríase "dafechu" al doblaxe de llargumetraxes y programes infantiles, "concretando los proyectos cola RTPA".
Per otru llau, y yá ente los oxetivos específicos de RTPA, que va recibir más de 23 millones del Gobiernu asturianu, márcase consolidar los servicios informativos, caltener les audiencies o lluchar contra la violencia machista, ente otres temes, pero nun s'especifica nestes cuentes el so llabor na promoción del asturianu.
