UVIÉU, 2 May. (EUROPA PRESS) -
Representantes de los grupos municipales del PSOE, IX y Somos Uviéu xunto a representantes de la Xunta pola Defensa de la Llingua Asturiana (XDLA), fotografíaronse esti miércoles delantre de la Casa Conceyu con carteles de la manifestación d'esti vienres a favor de la oficialidá.
Ente ellos taben la vicealcaldesa Ana Taboada (Somos); el conceyal de Cultura Roberto Sánchez Ramos(IX); la conceyala d'Educación, Mercedes González (Somos); el conceyal d'Interior Iván Álvarez (IX); o'l d'Urbanismu Ignacio del Páramo (Somos), amás del conceyal socialista Diego Valiño.
El portavoz de la XDLA, Xosé Candel, esplicó que se trata d'un actu pa visibilizar l'apoyu de los grupos municipales y pa llamar a la participación na manifestación que sal a les 19.30 hores de la Estación del Norte.
Nesi sentíu, Candel afirmó qu'espera que la convocatoria sía "masiva como la del 21 d'abril", pero quixo diferenciala de la d'hai 15 díes. "L'anterior quería visibilizar l'apoyu nun día y horariu meyor pa la participación, esta ye la tradicional que se fai tolos años pol Día de les Lletres", esplicó.
Amás, apuntó que ye la 32 vez que se fai, "polo que yá ye masiva nel tiempu y na participación". Por eso, dixo que "ye hora" de que se ponga fin "a esta situación d'inxusticia que ye la falta d'oficialidá de la llingua asturiana".
Per otru llau, indicó que la d'esti vienres mantién los apoyos y preguntáu pola posible presencia del secretariu xeneral de la FSA, Adrián Barbón, nesta manifestación --na anterior xustificó la non participación por tener otru actu programáu--, Candel dixo que la XDLA cuenta con que tean representantes de la executiva de la FSA.
"Equí mesmo hai un representante del grupu socialista municipal --Diego Valiño-- y contamos con que la FSA va siguir apoyando la oficialidá nel futuru", esplicó.
LES PALABRES DE SANJURJO
A preguntes de los periodistes, Candel tamién se posicionó en contra de les palabres del presidente de la Xunta Xeneral, Pedro Sanjurjo, que fixo apueste por mantener l'estatus vixente pa la llingua asturiana, basáu na aplicación de la Llei d'Usu, onde nun se fala d'oficialidá.
"Sanjurjo sabe meyor que naide que la Llei d'Usu tuvo guardada nun caxón escaecida 20 años y que la saquen agora como escudu énte la posibilidá de que por fin haya oficialidá", afirmó, pa indicar que tolos partíos tienen una propuesta que-yos fixo la XDLA de modificación del artículu 4 del Estatutu pal debate "y pa poder facelo yá nesta llexislatura".
Sobre'l debate de si tien que ser nesta o na próxima cuando s'abra la reforma del Estatutu, el portavoz de la XDLA esplicó que "ye posible nesta". "Agora mesmo tolos partíos saben, sobre too el PSOE, que ye inevitable, polo que nun entendemos que heba qu'esperar otra llexislatura, nel momentu qu'haya una inxusticia hai que trabayar pa resolvela", sentenció.
