Recupérase la votación presencial nos plenos como exemplu de "vuelta a la normalidá"
UVIÉU, 14 Abr. (EUROPA PRESS) -
El PSOE propunxo al restu de formaciones una propuesta pal usu del asturianu na Xunta Xeneral. La mesma contempla que si daquién intervien nesta llingua y otru diputáu diz nun entendelo, habría qu'apurrir la intevención en castellanu per escritu o, nel so casu, realizar una doble intervención n'asturianu y castellanu, pa lo que'l compareciente dispondría del doble de tiempu.
Los grupos parllamentarios trataron esti miércoles, en Xunta de Portavoces, una propuesta del PSOE pal usu del asturianu y el castellanu na Xunta Xeneral. La fórmula pretende dar respuesta a la sentencia del Tribunal Constitucional sobre l'usu del asturianu nel parllamentu autonómicu y evitar la traducción simultánea.
Asina, nel casu de qu'un diputáu diga nun entender una intervención n'asturianu, va tener que repetila en castellanu. La intervención quedaría recoyida de manera billingüe --asturianu y castellanu-- nes publicaciones de la Cámara. Los servicios xurídicos de la Xunta tienen que dar forma a esta propuesta, pa depués treslladala al restu de grupos y votala.
Según adelantaron fontes socialistes a Europa Press, esta propuesta xeneró consensu ente delles de les formaciones presentes na Xunta de Portavoces. Sicasí, dende Podemos, Daniel Ripa, diz qu'esta midida implicaría la obligación de "traducir lliteralmente la intervención" al castellanu, llamentando que nel diariu de sesiones "prevaleza" la versión en castellanu y el riesgu de "espulsión" pa los diputaos que se negaren a traducir la so intervención al castellanu.
Entiende Ripa, polo tanto, que se trata d'una "discriminación" al usu del asturianu na Xunta Xeneral y alerta de que si se consolida como "midida indefinida" siguiría siendo efectiva "independientemente de qu'haya oficialidá". Coles mesmes, asegura que tolos diputaos de la Xunta Xeneral entienden "perfectamente" les intervenciones n'asturianu y en gallego-asturiano, polo que considera que negar la so comprensión forma parte d'un "boicó" a la normalización de la llingua asturiana.
Dende'l PP, el so portavoz axuntu Pablo González alvertía del riesgu de traducción simultánea de nun algamar un alcuerdu sobre l'usu del asturianu. Una situación que, considera, llevaría al "ridículu" y que, cree, tien qu'evitase. Por eso, los 'populares' apuesten por "dar normalidá a lo que ye normal" y alloñase de polémiques, valorando que l'alcuerdu permite l'usu del asturianu na Cámara y l'usu del castellanu en toles intervenciones.
La portavoz de Ciudadanos, Susana Fernández, recordó que'l PSOE fixo una propuesta verbal na Xunta de Portavoces que se sometió a debate. P'acabar, decidióse que teníen de ser los servicios xurídicos de la Cámara los que treslladaren una propuesta escrita. "Ciudadanos nun taba d'alcuerdu nel planteamientu que se fixo en dalgún puntu, pero vamos esperar a que se nos manden la propuesta de los lletraos pa manifestanos nesi sentíu", esplicó.
Per otru llau, el portavoz de Foru, Adrián Pumares, punxo en dulda "qu'haya daquién na Xunta Xeneral que nun entienda les intervenciones feches n'asturianu". Con too, pa cumplir colo qu'indica'l Tribunal Constitucional apuesta por una doble intervención de los diputaos, n'asturianu y castellanu, "col doble de tiempu", en casu d'una "supuesta incomprensión" por dalgún parllamentariu.
Y ye que Pumares quixo dexar claro que "esti nun ye un problema de comprensión, sinón d'intolerancia". D'esta manera, considera que "los grupos parllamentarios y los diputaos qu'afirmen nun entender la llingua asturiana, tendríen que plantease "si tán capacitaos pa representar a la sociedá asturiana ensin ser capaces d'entender la so llingua".
Per otru llau, el portavoz de Vox, Ignacio Blanco, recordó que la so formación yá propunxo hai un añu que se facilitaren les intervenciones escrites n'español, dalgo que refugó la Xunta de Portavoces. Asina que, según declaró, agora van esperar a la propuesta per escritu que presente'l PSOE "y a partir d'ehí, vamos valorar y vamos estudialo".
Con too, esplicó que Podemos "zarróse en banda mesmo énte una situación de TC d'obligáu cumplimientu". "Negáronse mesmo a aceptar que se fixera la intervención en bable y pol mesmu tiempu n'español. Podemos nun quier nin respetar les sentencies del TC, quier ensin más imponer la so voluntá", sentenció.
VOTACIÓN PRESENCIAL
La Xunta de Portavoces tamién analizó, entre otros asuntos, una propuesta del PP pa recuperar les votaciones presenciales nos plenos. La iniciativa, que salió alantre, va suponer que tolos diputaos vuelvan tar presentes a la de la votación.
El 'popular' Pablo González argumentó que'l votu telemáticu ye un "recursu estraordinariu" pero la situación actual yá nun ye "tan estraordinaria" polo que la Xunta Xeneral tien que dar exemplu de "vuelta a normalidá" recuperando la so actividá política completa.
