UVIÉU, 3 Jul. (EUROPA PRESS) -
El grupu municipal socialista de la capital asturiana va entamar acciones llegales pa impugnar la contratación de la campaña turística nueva de la ciudá, titulada 'Seguramente Oviedo'.
Según el PSOE, l'equipu de Gobiernu local --formáu por PP y Ciudadanos-- aprovechóse de la llexislación especifica pa la situación d'emerxencia sanitaria pa facer "un contratu a deu" cuando nos presupuestos municipales yá existía una partida pa campañes turístiques.
Asina lo denunció'l conceyal socialista Ricardo Fernández esti vienres n'Uviéu depués d'analizar la forma contractual de la campaña y los pasos daos pol equipu de gobiernu pa efectuar la contratación.
Fernández esplicó que la contratación realizóse al traviés d'un contratu d'emerxencia, llegalmente previstu pa facer frente a les consecuencies directes y indireutes de la crisis sanitaria. Una llexislación "pa mercar unes mázcares o unes mampares, pero non pa reactivar económicamente nada", esplicó.
Amás, alertó de que'l contratu de la campaña --cifráu en 362.811 euros-- realizóse con "falta de tresparencia" cuando pol so montante económicu tendría que publicase énte les autoridaes europees.
Per otru llau, indicó que la convocatoria nun tuvo unos "criterios claros" de selección, incumpliendo, dixo, los criterios de llibre competencia. "Los uviedinos nun van a saber si'l gastu de los sos recursos ye correctu", indicó'l conceyal.
"Nós nun tamos en contra de que'l Conceyu faiga una promoción turística, tolo contrario: ye bono pa la ciudá, pero nun pue facese un fraude de llei, faciendo una axudicación directa aprovechándose d'una llexislación pensada pa situación d'emerxencia", sentenció'l conceyal socialista.
