UVIÉU, 2 May. (EUROPA PRESS) -
El PSOE de Xixón denunció que'l gobiernu de Carmen Moriyón (Foru) cambió'l nome del programa 'Préstame facer deporte' pa quitar l'asturianu y pasar a llamase 'Me gusta el deporte'.
Según indicaron al traviés de nota de prensa, na Xunta Rectora del Patronatu Deportivu Municipal celebrada el martes, l'equipu de l'alcaldesa, col conceyal del ramu Jorge Pañeda al frente, xustificó esta decisión pa "nun confundir a les neñes y los neños colos idiomes".
"Ye un atropellu a la promoción del asturianu. Mostramos abiertamente la nuestra quexa y defendemos ensin dulda l'usu d'una espresión asturiana como esta", afirmó'l conceyal del PSOE, Jacobo López.
Amás, criticaron que'l gobiernu local dixo que yera la primer vez qu'otru programa, el de 'Vacaciones Deportivas', incluyía los bolos asturianos y la petanca.
"La petanca nun ye un deporte tradicional asturianu, ye d'orixe francés. Vox yá nun ta nel gobiernu, pero les idees de la ultraderecha siguen presentes con Foru, PP y el tránsfuga y esa obsesión por facer desaparecer cualquier rastru que nos lleve a la llingua y a la cultura asturiana", conclúi López.
