"España nun se merez esti show permanente, nun se merez esta política de 'tuit'", apunta
UVIÉU, 25 Abr. (EUROPA PRESS) -
El secretariu xeneral y portavoz parllamentariu de Foru Asturies, Adrián Pumares, acusó esti xueves al presidente del Gobiernu d'España, Pedro Sánchez, de "pretender enllamuergar y atapar unes posibles responsabilidaes xudiciales detrás d'un supuestu o un presuntu acosu y d'una cuestión familiar".
Pumares refirióse asina a la carta de Sánchez, na qu'anuncia que suspende la so axenda hasta'l llunes, 29 d'abril, cuando va facer públicu si sigue nel cargu de presidente del Gobiernu depués de la denuncia contra la so esposa.
"Yo creo que nada nos pue sosprender de lo que faiga Pedro Sánchez, pero hai una cuestión que m'esmolez descomanadamente, que ye'l nivel de populismu y de demagoxa nel que tamos instalaos y que'l Partíu Socialista y que Pedro Sánchez ta instalando a la política n'España".
Pumares considera que la decisión política del xefe del executivu español ye "una estratexa propia d'otros líderes políticos como pue ser Trump o Bolsonaro, que ye principiar un movimientu plebiscitariu, pretender facer ver a la sociedá qu'o se ta con Pedro Sánchez, o se ta contra Pedro Sánchez y creo qu'eso ye mui peligrosu".
"A la fin hai una especie de vacíu de poder porque tenemos un presidente del gobiernu que nun va exercer como presidente del gobiernu en toos estos díes. España nun se merez esti show permanente, nun se merez esta política de 'tuit', esta política de demagoxa y lo que precisamos ye seriedá y aselu y desgraciadamente tenemos un presidente del gobiernu d'España que nos da too menos aselu y tranquilidá", apunta Pumares.
