UVIÉU, 6 May. (EUROPA PRESS) -
El rector de la Universidá d'Uviéu, Ignacio Villaverde, considera que la oficialidá del asturianu sería "un pasu más" na normalización d'usu y la protección de la llingua como elementu del patrimoniu cultural y históricu de la comunidá autónoma.
Asina lo indicó en declaraciones a los medios enantes de participar col conseyeru de Ciencia, Empreses, Formación y Empléu, Borja Sánchez, nes primeres xornaes del Institutu de Ciencies y Tecnoloxíes Espaciales d'Asturies (ICTEA) sobre los retos científicos de los años vinientes.
Pa Villaverde, la oficialidá nun afecta más que al funcionamientu de les alministraciones públiques na so rellación cola ciudadanía y, nesi sentíu, resalta que la institución académica trabaya dende años na llinia d'usu y promoción del asturianu, incluyida la creación del área d'estudios asturianos. "La cooficialidá sería relevante pa reforciar y dar más impulsu a dalgo que lleva faciendo la Universidá d'Uviéu dende hai tiempu", diz.
Recuerda que nel so manual d'identidá corporativa, la universidá incorporó, hai un añu y mediu, na so grafía, na so papelería y nos sos símbolos l'usu de la llingua asturiana. Dalgo que pal rector ye "espresión de la normalidá cola que la comunidá universitaria vive l'usu del asturianu nel so senu".
Coles mesmes, avanza que d'aprobase la cooficialidá, qu'agora vuelve al debate políticu depués del anunciu del presidente Adrián Barbón de convocar a los grupos parllamentarios pa tratala, la Universidá d'Uviéu va ser "la primera" en facelo.
"Qu'a naide-y quepa nenguna dulda", afirma, argumentando que pa la institución académica "sería una cuestión namás alministrativa, non un cambiu sustancial nes maneres d'actuar" porque na Universidá d'Uviéu "dende hai munchos años l'asturianu vívese con normalidá dafechu".
