UVIÉU, 15 Dic. (EUROPA PRESS
El ministru de Fomentu, Iñigo de la Serna, presentó esti xueves n'Uviéu un Plan de cercaníes p'Asturies que plantea incorporar, por primer vez n'España, una pequeña serie de trenes tresformaos pa que puedan emplear gas natural llicuao (GNL) - nel sitiu de gasóil.
D'esta forma, según esplicó'l departamentu de De la Serna, va amenorgase l'impactu ambiental. Nel añu 2018 van empezar n'Asturies les pruebes del prototipu y nel mesmu añu, si'l resultáu ye positivu, van ser reformaos los vehículos de la miniserie inicial pa la so posterior esplotación comercial.
Too esto forma parte de les propuestes de renovación qu'inclúi'l plan nel material rodante d'anchu métricu, que contempla una inversión de 45 millones en trenes nuevos nel periodu que va de 2019 a 2022. En total, van incorporar n'anchu métricu diez vehículos nuevos.
Nel núcleu d'Asturies, nel anchu ibéricu, la dotación actual del parque pa los servicios de cercaníes ye de 17 vehículos. Nun ta prevista la so renovación al tratase d'una serie moderna, según el plan.
