UVIÉU, 15 Nov. (EUROPA PRESS) -
La Xunta de Portavoces del Parllamentu asturianu d'esti xueves alcordó refugar la propuesta de Podemos y IX de convocar un plenu monográficu pa tratar la reforma del Estatutu d'Autonomía pa incluyir la oficialidá del asturianu. Con too, la cuestión va sometese a la toma de consideración de la cámara'l 23 de payares próximu.
Dende Podemos criticaron que tolos grupos, menos los proponentes, refugaren destinar un plenu adicional pa tratar esta reforma. López foi especialmente críticu col PSOE, reprochando que diga nos sos documentos congresuales qu'apoya la oficialidá del asturianu y nun facilite la celebración d'esti plenu.
Al so xuiciu, sería una oportunidá pa dar respuesta a una reivindicación qu'una "parte importante de la sociedá" lleva demandando "cuarenta años". "Pal nuestru grupu ye una cuestión de derechos, ye una cuestión que suma y que nun resta, y qu'amás ta aceptada pacíficamente pola sociedá asturiana como una midida importante p'avanzar nel camín de la protección de la llingua asturiana", señaló.
