RENFE nun usa la toponimia oficial asturiana porque "nun ye una de les llingües oficiales d'España"

Publicado 28/03/2018 10:09:35CET
EUROPA PRESS - Archivo

UVIÉU, 28 Mar. (EUROPA PRESS) -

RENFE nun usa la toponimia tradicional asturiana de los conceyos onde esta ye oficial porque "la web y les estaciones tán nos idiomes oficiales d'España".

Esta ye la respuesta, recoyida por Europa Press, qu'ufrió la principal operadora ferroviaria española, dependiente del Ministeriu de Fomentu, al traviés del so twitter a un usuariu que entrugó a RENFE porque nun recoyíen na so web la toponimia oficial asturiana y si diben a iguar esi "erru".

"Nun hai nengún erru, la web y les estaciones tán nos idiomes oficiales d'España", respondieron dende RENFE, que tamién esplicó que la web ta en castellanu, catalán, gallegu, vascu "y tamién nos otros idiomes estranxeros pa los compradores d'otros países".

Una respuesta que foi criticada por multitú d'usuarios, que se quexaron de qu'anque l'asturianu nun ye oficial, la toponimia tradicional asturiana tenía que tar como establecía la llei.

La Llei d'Usu y Promoción del Asturianu, aprobada en 1998 col gobiernu 'popular' de Sergio Marqués, establez que los topónimos de la Comunidá Autónoma del Principáu d'Asturies van tener la denominación oficial na so forma tradicional.