UVIÉU, 17 Ene. (EUROPA PRESS) -
El presidente de l'Academia de la Llingua Asturiana (ALLA), Xosé Antón González Riaño, llamentó'l fallecimientu del expresidente del Principáu d'Asturies y senador socialista, Vicente Álvarez Areces, al qu'agradez que foi'l que dotó a la institución d'unes "instalaciones dignes".
En declaraciones a Europa Press, Riaño esplicó que l'ALLA yá fixo llegar el pésame a la familia porque "pa nós ser presidente d'Asturies ye una dignidá mui grande y respetamos como tal esa dignidá". Amás, destacó qu'Areces participó na manifestación qu'entamó Conceyu Bable en 1976, la primera de la Transición n'Asturies, onde se pidió l'autonomía y la entrada del asturianu nel sistema educativu.
Con too, el presidente de l'Academia esplicó que l'expresidente "enxamás entendió la importancia de la llingua y la cultura del pueblu asturianu", anque dende l'ALLA siempre-y agradecieron el fechu de que foi'l Presidente que dio a la institución "unes instalaciones dignes y acordies coles sos funciones".
Foi'l mesmu expresidente'l que nel 2010 inauguró la sede de l'Academia de la Llingua Asturiana nel Monesteriu de San Pelayo, nes dependencies antigües del Archivu Históricu, nel centru d'Uviéu.
Areces asumiera'l compromisu d'allugar a l'Academia nuna sede digna y afayadiza pa les necesidaes de la institución, qu'hasta esi momentu y dende la so puesta en marcha en 1981 pol Conseyu Rexonal, l'organismu preautonómicu, tuviera allugada nun pisu propiedá del Principáu na cai Marques de Santa Cruz.
