MADRID, 15 Feb. (EUROPA PRESS) -
El presidente del Gobiernu, Pedro Sánchez, anunció esti miércoles la convocatoria d'elecciones xenerales pal 28 d'abril próximu poniendo asina fin a una llexislatura revesosa de dos años y diez meses de duración. Sánchez llegó a la Moncloa con una moción de censura, depués de desallugar a Mariano Rajoy y gobernó hasta'l día de güei namás ocho meses, presidiendo'l gobiernu más curtiu de la democracia.
El xefe del Executivu decidió adelantar les elecciones depués de que'l Congresu refugara esta mesma selmana'l so proyectu de Presupuestos Xenerales del Estáu (PXE) pa 2019. Ye la segunda vez qu'asocede, la primera foi 1995 con Felipe González, provocando tamién la convocatoria d'elecciones anticipaes.
Les últimes elecciones xenerales celebráronse'l 26 de xunu de 2016, teniendo que ser convocaes pol Rei nuna situación insólita énte la incapacidá de los grupos parllamentarios p'apoyar la investidura d'un presidente del Gobiernu depués de los comicios d'avientu de 2015.
Depués d'estes segundes elecciones de xunu de 2016, a Mariano Rajoy investiéronlo presidente del Gobiernu n'ochobre d'esi añu con mayoría simple en segunda vuelta, con apoyu del PP, Ciudadanos, Coalición Canaria, UPN y Foru Asturies; y l'astención d'una parte grande de los diputaos del PSOE.
Esta postura de los socialistes provocó que Pedro Sánchez dexara l'escañu nel Congresu, anque recuperaría'l lideralgu del partíu nes primaries que los socialistes celebraron en mayu de 2017 imponiéndose en primaries a la entós presidenta andaluza, Susana Díaz, y al históricu dirixente vascu Patxi López.
Un añu depués de volver ser líder de los socialistes, Sánchez dio'l pasu de presentar una moción de censura contra Mariano Rajoy depués de la sentencia de l'Audiencia Nacional condergando al PP como parte a títulu codalosu de la trama Gürtel.
La moción debatióse nel Congresu los díes 31 de mayu y 1 xunu de 2018 y aprobóse con 180 votos a favor, 169 en contra y 1 astención. Votaron a favor los diputaos del PSOE, Unidos Podemos, ERC, PNV, PDeCAT, Compromís, Bildu y Nueva Canarias.
Ocho meses depués, Sánchez anunció la convocatoria d'elecciones xenerales poniendo asina fin al Gobiernu más curtiu de la democracia. Los comicios del 28 d'abril van ser les decimocuartes elecciones dende la Transición y les terceres de Felipe VI como Rei.
