UVIÉU, 26 Nov. (EUROPA PRESS) -
Iniciativa pol Asturianu va rexistrar una quexa formal énte'l Gobiernu d'Asturies pola publicación d'un documentu de la Conseyería de Servicios y Derechos Sociales nel que s'espón que tola documentación tien que presentase en llingua castellana.
Esti requisitu ye "illegal dafechu", según denuncia la organización al traviés de nota de prensa, porque la Llei d'Usu afita que va tenese por válido l'usu del asturianu nes comunicaciones orales o escrites de los ciudadanos col Principáu.
La denuncia de Iniciativa vien díes depués de que se quexaren pol casu d'una funcionaria que reclamó a una ciudadana que nun usare l'asturianu de forma oral nuna comunicación. Agora, l'Alministración autonómica pide que nun s'utilice otra llingua que nun sía'l castellanu "lo que supón saltase'l mandatu de la Llei".
Por eso, Iniciativa pide la retirada "inmediata" del documentu, la eliminación del requisitu y la publicación de formularios en billingüe asturianu/castellanu. "Si'l tope pal Gobiernu actual no que cinca a la llingua asturia ye la Llei d'Usu, animamos a los sos miembros a que la cumplan de manera real, sinón ye una tomadura de pelo", sentencien.
