UVIÉU, 3 Dic. (EUROPA PRESS) -
La conseyera d'Educación del Principáu, Carmen Suárez, refirióse esti martes a los resultaos d'Asturies nel informe del Programa Internacional d'Evaluación del Alumnáu (PISA) y destacó que la rexón presenta resultaos meyores que'l promediu de los 36 países de OCDE por tercer edición consecutiva en toles competencies, y superiores tamién a los del restu d'España. Incidió amás que los datos demuestren qu'Asturies "tien un sistema educativu de calidá, equitativu y homoxéneu".
"El nuestru sistema educativu presenta resultaos meyores por tercer vez consecutiva, mesmo perriba a los d'otres comunidaes d'España", manifestó Carmen Suárez que con too recordó qu'esti informe "ye namás una parte". "PISA nun ye too y hai munchos más factores qu'intervienen nel rendimientu y la calidá d'un sistema", incidió la conseyera.
Fernández, foi esbillando los principales resultaos d'esta evaluación internacional afalada pola OCDE. Destacó que les tases de participación del alumnáu asturiano son escelentes, con 2.096 estudiantes de 55 centros educativos, que representen al 98% del alumnáu de 15 años.
Fernández destacó que'l promediu d'Asturies ta 10 puntos perriba del d'España en Matemátiques, onde la comunidá llogra una puntuación de 491 puntos y 13 puntos perriba en ciencies, onde la media de la rexón ta en 496.
Amás, Asturies llogra 2 puntos más que la OCDE en matemátiques y 7 más en ciencia. En nenguna de les dos competencies hai diferencies estadísticamente significatives ente homes y muyeres.
Asina, como conclusión destaca que la calidá del sistema educativu n'Asturies ta perriba del del conxuntu d'España y ye similar a la redolada europea y conxuntu de países desenvueltos.
Nel informe estúdiase tamién les evidencies de la equidá educativa. Nesti casu, el los datos referíos a Asturies dende la conseyería d'Educación resalten dellos aspectos como que nun hai diferencies significatives estadísticamente ente homes y muyeres; qu'en comparanza colos promedios internacionales los resultaos del alumnáu son bastante homoxéneos y como tercer datu a destacar que les diferencies ente centros son relativamente pequeñes.
