UVIÉU, 25 Abr. (EUROPA PRESS) -
Tolos grupos políticos representaos nel Conceyu de Mieres --IX, PP, PSOE y Vox-- reclamaron el primer tren de l'AVE hacia Madrid y l'últimu hacia Asturies tenga parada nos Valles Mineros, una declaración institucional que van treslladar al Ministeriu de Tresportes y a los responsables máximos d'ADIF y Renfe.
Nel testu, indícase que l'apertura de la Variante de Payares "ye ún de les meyores más relevantes de los últimos años p'Asturies que tenemos d'aprovechar pal desarrollu económicu y empresarial, y polo tanto, pa la xeneración d'empléu y riqueza".
Con too, les cuatro fuercies polítiques esplicaron qu'esta situación nun pue suponer "conectar unes ciudaes y desconectar a otres", polo que pa les Cuenques Mineres "la llegada de l'AVE ye una premisa básica pa la nuestra estratexa de futuru". Asina, reconocen qu'Avilés, Xixón y Uviéu tienen que "xugar un papel decisivu" y que nun van participar "en nenguna batalla localista".
Por eso, reivindicaron más paraes d'AVE pa Mieres y L.lena. En concreto, reclamaron que Mieres tenga una parada nel primer tren con destín a Madrid y l'últimu con destín a Asturies.
"Reclamar más paraes AVE en Mieres nun supón nenguna torga pa naide n'Asturies nin en Madrid. Son malapenes unos minutos que son oru pal futuru, l'actividá económica y les oportunidaes non namás de los nuestros dos conceyos, sinón del conxuntu de los Valles Mineros", indicaron, pa señalar qu'en 2023 hubo más de 11.000 persones que viaxaron n'Alvia a Mieres.
