BELGRADO, 27 de Mayu (Reuters/EP)
El Tribunal Especial pa crimes de guerra de Belgrado determinó que l'ex comandante y presuntu criminal de guerra serbo-bosniu Ratko Mladic ta en condiciones pa que lu estraditen a La Haya, sede del Tribunal Penal Internacional pa l'antigua Yugoslavia (TPIY). L'imputáu tien hasta'l llunes pa recurrir esta decisión.
"L'abogáu de Mladic recibió la documentación relativa a la estradición y tien hasta'l llunes pa recurrir", declaró un xuez del tribunal, Maya Kovacevic. A Ratko Mladic examinólu una comisión médica "que determinó que ta en condiciones pa futuros procedimientos", añadió.
De primeres, Darko Mladic, el fíu de Ratko Mladic, alvirtiera en nome de la familia qu'al so padre nun podíen estraditalu al Tribunal Penal Internacional pa l'antigua Yugoslavia nes sos actuales condiciones de salú.
"Nun van poder estraditalu nes actuales condiciones", declaró. Según el fíu, Ratko Mladic sufrió dos infartos cerebrales, tien prácticamente paralizada la mano derecha y malpenes pue falar. "Ta en mui mala forma. El so brazu derechu ta mediu paralizáu y el llau derechu ta parcialmente adormiláu", declaró Darko Mladic.
"Ratko Mladic recibió algún tratamientu", añadió. "Sicasí, pidimos que se-y tresllade a un hospital militar y solicitamos l'envíu d'un equipu médicu independiente procedente de Rusia que supervise'l tratamientu", añadió. Nesti sen, aseguró, un cardiólogu y un neurólogu aceptaron desplazase dende Moscú p'atender al so padre, pero la so collaboración depende de l'autorización del tribunal.
Bosiljka Mladic y Darko Mladic, esposa y fíu respectivamente de Ratko Mladic, reuniéronse esti vienres con ésti la primer vez en diez años, según declaró l'abogáu de la familia, Milos Saljic, a la cadena de radio independiente serbia B92. "Reconociónos, ye consciente de que ta deteníu", esplicó Darko Mladic. A la pregunta de qué impresión-y dio alcontrase col so padre, respondió: "Imaxínelo".
Tres l'alcuentru familiar, a Mladic entrugáron-y por un xuez del Tribunal Especial serbiu pa crimes de guerra, nel marcu del so procesu d'estradición a La Haya pa que respuenda a los cargos de xenocidiu y crimes de guerra, y contra la Humanidá que se-y imputen pola so participación na guerra de Bosnia de 1992-1995.
