El rector califica de "tracamundiu" les sos palabres sobre l'usu del asturianu y destaca'l papel activu de la Universidá na normalización
UVIÉU, 4 May. (EUROPA PRESS) -
La Universidá d'Uviéu va crear una Cátedra de Lliteratura Asturiana en collaboración cola Conseyería de Cultura, Política Llingüística y Turismu. Amás, el rectoráu va principiar cola tramitación pa que la Filoloxía Asturiana pase a ser un 'maior' y tamién quieren constituir un Área de Filoloxía Asturiana dientro de la institución.
Asina lo anunció'l rector Ignacio Villaverde esti miércoles, nuna rueda de prensa acompañáu de la conseyera de Cultura, Política Llingüística y Turismu, Berta Piñán. Actualmente, los estudios de filoloxía asturiana son un 'minor' de 48 creitos dientro del Grau de Llingües Modernes y les sos Lliteratures que nun tien reconocimientu dientro de les titulaciones --quier dicise, nun apaez nel títulu final que recibe l'alumnu al superar los estudios--.
La Universidá quier dar un pasu más y impulsar el so reconocimientu académicu convirtiendo estos estudios nun 'maior'. Quier dicise, que l'asturianu sía la 'Llingua B' dientro d'esi Grau, polo que pasaría a unos 120 creitos y yá figuraría nos títulos. Per otru llau, tamién quieren constituir un Área de Filoloxía Asturiana dientro de la Universidá d'Uviéu.
Anque l'equipu rectoral va principiar la tramitación del 'maior' una vez aprobaos los planes estratéxicos, el rector reconoz que'l procesu ye "mui complicáu" porque precisa d'una modificación de los planes d'estudios y de recibir el preste en Madrid de l'ANECA y del Conseyu d'Universidades, polo que nun sería una realidá enantes "d'añu y mediu o dos años".
Nel casu del Área de Filoloxía Asturiana, el rector diz que quieren poner en marcha esti "fitu na historia de la Universidá" lo más ceo posible, pero teniendo en cuenta que tien qu'aprobase nel Conseyu de Gobiernu de la Universidá, pasar al Conseyu de Gobiernu del Principáu y llegar al Conseyu d'Universidaes, en Madrid. "Ye una tramitación complexa, pero non complicada, porque hai alcuerdu na Facultá y vese que ye'l momentu", dixo.
Más fácil va ser la puesta en marcha de la Cátedra de Lliteratura Asturiana, que surde gracies a un conveniu pa financiala cola Conseyería. Asina, les dos entidaes esperen qu'eche andar el cursu que vien. Sería, en palabres de Piñán, "un proyectu mui importante pa la visibilidá de la lliteratura asturiana" porque constaría de programes y actividaes que pondríen el focu nes lletres asturianes. La Universidá y la Conseyería esperen que la Cátedra pueda atropar tamién financiación d'entidaes privaes.
Piñán valoró la collaboración cola Universidá al traviés de midíes como la financiación d'un Serviciu de Normalización que nestos momentos cuenta con dos becaries que faen llabores de traducción. Sobre'l 'maior' futuru dixo que yera una "reivindicación vieya" que supón "una oportunidá pa consolidar los estudios de Filoloxía Asturiana" y qu'espera "que nos lleve al Grau de Llingua y Lliteratura Asturiana".
COMPROMISU COLA NORMALIZACIÓN
Villaverde mostró la so "firme voluntá" de que la Universidá "fomente" y "mime" les señes d'identidá d'Asturies "porque formen parte de lo que somos" y "son parte del nuestru patrimoniu". Nesi sentíu, llamentó la "polémica" xenerada pol "tracamundiu" coles sos palabres sobre l'usu del asturianu na institución. "Nun acerté a espresame con tola corrección", afirmó.
El rector lleyó un manifiestu n'asturianu ellaboráu pol so equipu onde destacó'l "papel principal y relevante" de la institución queque dirixe na promoción y caltenimientu de la llingua, siempre "lloñe de debates políticos". Recordó que los estatutos de la Universidá --que d'equí a poco van publicase n'asturianu-- recueyen que l'asturianu tien que ser oxetu d'estudiu y d'enseñu.
Por eso, calificó les acciones anunciaes como "necesaries" pa cumplir cola so función nel procesu de normalización de la llingua asturiana dientro del "papel activu" que-y atribúi la Llei d'Usu.
"El proyectu del equipu rectoral parte de la convicción de que la llingua asturiana nun tien que ser motivu de conflictu. La llingua forma parte de la Universidá y tien que, cumpliendo la Llei d'Usu, fomentase'l so conocimientu, la so docencia y la so investigación", dixo.
Amás, recordó que nel so mandatu ta produciéndose la "normalización" na tramitación de los documentos académicos o alministrativos n'asturianu, qu'hasta'l momentu xeneraben "incertidume". "Ye más, nel rectoráu cuando recibimos testos n'asturianu contestamos nesta llingua. Forma parte del respetu", dixo.
