Actualizado 12/12/2016 14:54 CET

Usuarios del CAI de Meres, autores del cómic n'asturianu 'Castrones a la carrera. Agroculebrón asturianu'

Presentación del cómic 'Castrones a la carrera'
EUROPA PRESS

UVIÉU, 12 d'Avientu (EUROPA PRESS)

Quince usuarios del Centru d'Apoyu a la Integración (CAI) L'Arboleya, de Meres, y dos profesionales de la entidá, ellaboraron el cómic n'asturianu 'Castrones a la carrera!! Agroculebrón asturianu'. Trátase d'una iniciativa pionera d'aproximación al llinguaxe audiovisual que pue tener continuidá nel 2017 cola producción d'un cortumetraxe.

Asina lo esplicaron esti llunes en rueda de prensa los autores y profesionales que los acompañaron na iniciativa cola la conseyera de Servicios y Derechos Sociales, Pilar Varela, y el xerente de la Fundación Asturiana d'Atención y Protección a Persones con Discapacidá (Fasad), José Luis Palacio.

Fasad editó una tirada de 1.000 exemplares que van repartise ente usuarios y familiares de los CAI. La presentación d'esta mañana ante los medios pa dar a conocer el proyectu a la sociedá asturiana, va completase'l vienres en Meres con un actu "más familiar" de magar les 11.30 hores.

La ellaboración del cómic supunxo 20 meses de trabayu, nos que se desplazaron a dellos escenarios naturales como la plaza de la Catedral d'Uviéu, les playes de Xixón, o Villar de Piñeres, n'Ayer, pa rodar escenes que depués incorporaron al guión.

Disfraces, instrumentos de madera o cartón y elementos d'escenificación ellaboraos pol equipu de producción, 'Meres Big Band', valieron pa dar realismu a una historia qu'entemez intriga, acción y sensibilidá social, utilizando la llingua asturiana pa narrar les viñetes llograes al traviés d'una aplicación de móvil que tresformó en dibuxu les imaxes captaes nes sesiones de rodaxe.

El títulu del cómic 'Castrones a la carrerra!! Agroculebrón asturianu' foi lo último en decidise y fai honor "a lo elemento y travieso" de los sos autores y protagonistes que, amás, forfugaron hasta l'últimu día pa esfrutar del procesu de creación.

Asturianu ofrecido por