UVIÉU, 23 Ene. (EUROPA PRESS) -
El Conceyu d'Uviéu va poner en marcha nes selmanes próximes una campaña a la que tán convidaos a sumase tolos clubes del conceyu que busca favorecer el civismu nos eventos deportivos.
Asina lo esplicó esti martes el conceyal de Deportes, Fernando Villacampa, que condenó los insultos al tríu arbitral que'l domingu dirixó un partíu de Rexonal Preferente en Ribedeva.
"Ye l'últimu exemplu d'una serie d'incidentes que vienen repitiéndose de forma periódica en tol país en dellos eventos deportivos", llamentó'l conceyal uvieín, que destacó la necesidá de combatir el racismu, la discriminación por razones de xéneru o cualesquier otru motivu, y los insultos nos campos.
La campaña va consistir en pancartes nes instalaciones municipales recordando a deportistes y públicu la necesidá d'esfrutar del deporte calteniendo un comportamientu cívicu.
Amás, van buscase alcuerdos coles distintes entidaes deportives de la ciudá pa "educar nel respetu tantu a los competidores como a los qu'acompañen a los eventos deportivos.
Nesti sentíu, va ponese especial atención nel deporte base, fomentando que los neños puedan esfrutar del deporte d'una forma sana y alloñando a les canteres de situaciones condenables y bochornoses qu'empañen l'esfuerciu y el trabayu de tolos que favorecen y esfruten de la práctica deportiva".
