UVIÉU, 18 Feb. (EUROPA PRESS) -
El xueves 21 de febreru, a les 18.30 na Casona de los Hevia, el conceyu de Villaviciosa celebrará'l Día internacional de la llingua materna con nun actu que cuntará cola presencia del alcalde Alejandro Vega y nel que se va facer entrega del premiu del II Concursu de relatos curtios 'Xosé Caveda y Nava'.
El premiu tien una dotación de 1000 euros y amás de mazana de plata conmemorativa, que nesta ocasión recayó nel escritor José Ángel Gayol (Mieres, 1977), pol cuentu tituláu 'Tolo que se sobre toles coses', del que se va presentar tamién la so edición en formatu electrónicu.
Amás d'esta entrega de premiu, va presentase'l númberu nuevu de la revista 'Friuz', a cargu de l'asociación El Ronchel, y el poeta y músicu Xaime Martínez (Uviéu, 1993), cantante del grupu La Bande, interpretará n'acusticu dellos de los temes del so primer trabayu en solitariu 'Ósculos d'agua nel imperiu asturianu'.
El Día Internacional de la Llingua Materna celébrase'l 21 de febreru en tol mundu pa concienciar sobre la diversidá llingüística y cultural y el multillingüismu. La fecha conmemora'l día de 1952 na qu'un grupu d'estudiantes, manifestándose pola reconocencia de la so llingua, el bengalí, foron dispersaos y asesinaos pola policía en Dhaka, capital de Bangladex.
