El PP pon d'exemplu'l tratamientu del so videu contra la oficialidá de la "desproporción" nos conteníos informativos
UVIÉU, 17 Oct. (EUROPA PRESS) -
El director xeneral de RTPA, Antonio Virgili, llanzó "el guante" a los grupos parllamentarios pa que sía la mesma Xunta Xeneral la que determine'l porcentaxe d'emisión en llingua asturiana na radiotelevisión pública, dalgo pa lo que Podemos, IX y Foru mostráronse a favor.
Sería al traviés de la ellaboración d'un mandato-marcu y el so desarrollu nun contratu-programa, como marca la Llei de RTPA de 2014 y que, según la mesma llei, tendría qu'aprobase hai cuatro años, pero que tovía nun se punxo en marcha.
Por eso, esti miércoles na Comisión de Control de RTPA y depués de que tanto Podemos Asturies como IX criticaron la, al so xuiciu, presencia curtia de la llingua asturiana dientro de la emisión de la cadena, Virgili púnxose a disposición de los grupos parllamentarios pa la ellaboración del mandato-marcu.
Nesi sentíu, dende IX, la diputada Marte Pulgar señaló ente les "faltes importantes" de RTPA la presencia del asturianu, sobremanera n'informativos y programación infantil. "Faen 3 o 4 cosines y enllénase-yos la boca con que cumplen la llei", señaló.
"Esta televisión cumple colos requerimientos llegales razonablemente bien", respondió Virgili, momentu qu'aprovechó pa "llanzar el guante" y señalar que'l pesu de la llingua asturiana tien que concretase nun mandato-marcu y depués nun contratu-programa.
El tema de la presencia del asturianu en RTPA tamién foi tratáu por Podemos Asturies. Asina, Daniel Ripa solicitó a Virgili qu'esplicara que recursos necesitaben p'ampliar la programación n'asturianu y que protocolos o llibros d'estilu marcaben el tratamientu del asturianu en RTPA.
"La programación n'asturianu pa dalgunos ye escesiva y pa otros ye curtia, nós tratamos de buscar el permediu", indicó Virgili, qu'aseguró que la presencia del asturianu ye un tema recurrente nes xuntes del Conseyu d'Alministración de RTPA, polo que volvió incidir en que fuera la Xunta Xeneral la que determinara los porcentaxes.
Amás, señaló que nun cuesta más facer un programa n'asturianu o castellanu y informó de que nun existe nengún protocolu sobre'l tratamientu de la llingua propia, anque recordó que se fixeron cursos d'alfabetización ente los trabayadores y qu'aprovechen el material ellaboráu pola Academia de la Llingua sobre l'oficiu periodísticu.
El guante llanzáu por Virgili sobre'l mandato-marcu foi recoyíu tanto por Podemos como por IX y Foru. Asina, Ripa calificólo de "necesario" y mostróse partidariu de dar pasos alantre enantes de qu'acabe la llexislatura.
Per otru llau, Pulgar (IX) afirmó que los grupos parllamentarios foron "incapaces" d'ellaborar el mandato-marcu esta llexislatura "polo que nun definimos el modelu de televisión pública que queremos y tamos nuna situación de permanente interinidá".
P'acabar, dende Foru, Pedro Leal mostróse dispuestu a debatir sobre'l mandato-marcu, anque recordó que los trés diputaos de Foru nun son abondo pa forciar la so tramitación.
PORCENTAXES DE LOS PARTÍOS
Na Comisión de RTPA tamién se trató sobre los criterios informativos que siguen en 'TPA Noticias' depués de que'l PP acusara a la cadena de nun atender a la proporcionalidá política. Nesi sentíu, el 'popular' José Agustín Cuervas-Mons afirmó qu'existe una "desproporcionalidá bultable" a favor del PSOE "o mesmo Podemos".
Punxo d'exemplu pa eso la información sobre'l video del PP contra la oficialidá qu'en 'TPA Noticias' duró 35 segundos, mentes que la pieza sobre'l videu de respuesta que publicó l'asociación Iniciativa pol Asturianu duró 49 segundos. "Considera qué tien más pesu Iniciativa que'l PP", preguntó Cuervas-Mons a Virgili.
"En RTPA nun hai nenguna intención de favorecer o desfavorecer nenguna opción política, nun sé como se fai eso", dixo'l director de RTPA, que defendió que los informativos de la televisión pública asturiana busquen la pluralidá y reflexar la realidá.
La mayoría de grupos enfearon l'actitú del PP. Asina, Jesús Gutiérrez (PSOE) afirmó que "tarán contentos na FSA, porque'l coordinador del PP ta cuntando los tiempos de la televisión en vez de facer política".
Per otru llau, dende Ciudadanos, Diana Sánchez acusó al PP de querer "fagocitar" a los partíos más pequeños, mentes que dende IX, Pulgar señaló que'l planteamientu nun pue ser "qu'hai de lo mío" sinón "pluralidá y calidá informativa", dalgo a lo que se sumó Foru, onde Pedro Leal añadió que "TPA nun pue ser como TV3".
CRÍTICA POLA COBERTURA EN SITUACIONES DE CRISIS
Ripa (Podemos) tamién defendió la imparcialidá y la pluralidá, anque aprovechó pa criticar que los informativos de TPA nun reaccionen énte situaciones como les quemes d'hai un añu o la vivida esti martes n'Avilés cola quema d'Arcelor. "Los asturianos tienen que dir a les televisiones de Madrid pa saber lo que pasa al llau de casa", señaló.
Unes acusaciones de les que Virgili defendióse alegando una falta de recursos que fai amás que nun existan informativos en RPA nes fines de selmana. "Taríamos encantaos d'aparar la programación y facer un especial informativu, pero nun tenemos nin personal nin recursos", señaló, pa considerar que "informativamente cubrióse perbién" l'incidente d'Arcelor.
