UVIÉU, 10 Dic. (EUROPA PRESS) -
El diputáu de Vox na Xunta Xeneral, Ignacio Blanco, calificó de "inxustificao" la medría de les partíes de la Conseyería de Cultura destinaes a la Promoción del Asturianu que, en comparanza colos presupuestos de 2019 y según Vox, xuben "cuasi" un 12%, y a l'Academia de la Llingua, "que se dispara más d'un 41%". "Más de la metá de la partida de 1,9 millones destinada a promocionar l'asturianu ye pa pagar personal y xuntes", apunta.
"Una vez más el presidente del Principáu, Adrián Barbón y el so equipu de Gobiernu dexen claro que nun-yos importen nin Asturies nin los asturianos y utilicen el presupuestos pa financiar chiringos socialistes y poner a los sos amigos. La llingua ye un chiringu más del PSOE. Ye'l so negociu particular", añade Blanco.
A xuiciu del portavoz, la "obstinación" del PSOE cola llingua "cuando existen datos del baxu nivel de matriculaciones nos centros educativos na asignatura asturianu", demuestra "una vez más la so incapacidá pa resolver los problemes reales de la nuestra rexón".
Ye más, "demuestren cuálos son les prioridaes de Barbón que nel presupuestu consolidáu de 2020 xube un 5,1% en comparanza con 2019, na promoción de la llingua dispárase hasta cuasi un 12%, más que Sanidá qu'aumenta un 2,8%, y perriba de la mayoría de partíes presupuestaries. Ta claro que l'apueste del Gobiernu del Principáu ye la llingua, enantes que los más necesitaos", destacó Blanco.
"¿Cómo esplica Barbón a los miles d'asturianos en situación de desempléu o que tuvieron qu'emigrar del Principáu qu'aumente les partíes pal asturianu y nun ponga en marcha midíes reales pa evitar l'éxodu xuvenil y el paru?", pregúntase Blanco.
Pero amás, continúa, "nun añu namás los presupuestos de la era Barbón destinen diez veces más de dineru a pagar encargos a otres empreses pa promocionar la llingua. Les cuentes son clares". Asina, según él, mentes qu'en 2019 "malapenes llegaben a 7.200 euros, pal 2020 la previsión dispárense hasta los 74.300 euros".
Dende Vox, sostién Blanco, "nun vamos dexar que se xuegue col dineru de los asturianos. Asturies va al debalu. De qué val encerriscase nuna llingua cuando lo que va sumir son los mesmos asturianos y la mesma Asturies".
